Referendum – xalqimiz xohish-irodasining ijobati

“Аdolat” SDPning Fargʻona viloyat Kengashida Oʻzbekiston Respublikasi Konstitutsiyasiga oʻzgartirish va qoʻshimchalar kiritilishi boʻyicha 30 aprelda boʻlib oʻtadigan umumxalq referendumi yuzasidan oʻquv seminar boʻlib oʻtdi. Unda partiya Siyosiy Kengashi raisi oʻrinbosari А.Rahmonov ishtirok etdi va maʼruza qildi.

Taʼkidlanganidek, Oliy Majlis Qonunchilik Palatasining 10 mart kungi yalpi majlisida Oʻzbekiston Respublikasining yangi tahrirdagi Konstitutsiyasi toʻgʻrisidagi qonun qabul qilindi. Qonun 30 aprel, yakshanba kuni boʻlib oʻtadigan umumxalq referendumida ovozga qoʻyiladi. Bevosita demokratiyaning muhim vositasi hisoblangan referendum umumxalq ovoz berish yoʻli bilan qonunlar qabul qilish va davlat ahamiyatiga molik eng muhim masalalarni hal qilish shaklidir. Uning saylovdan asosiy farqi — referendum oʻtkazilayotganda biron-bir lavozimga nomzod yoki nomzodlar roʻyxati uchun ovoz berilmaydi, balki unda muayyan masala — qonun, qonun loyihasi, konstitutsiya, konstitutsiyaga tuzatishlar, mamlakat xalqaro maqomiga taalluqli yoki ichki siyosatiga oid biror bir savol qoʻyiladi.

Joriy yilning 30 aprelida boʻlib oʻtadigan referendum byulletenida: “Siz Oʻzbekiston Respublikasi Konstitutsiyasi toʻgʻrisidagi Oʻzbekiston Respublikasi konstitutsiyaviy qonunini qabul qilasizmi?” deb yoziladi.

Yangi tahrirga asosan, Oʻzbekiston konstitutsiyasidagi moddalar soni hozirgi 128 tadan 155 taga, undagi normalar esa 275 tadan 434 taga oshirilyapti. 128 ta moddaning 91 tasiga konseptual oʻzgarishlar kiritilmoqda. Umuman olganda, konstitutsiya 65 foizga oʻzgartirilyapti.

– Yangilanayotgan Konstitutsiya taraqqiy etgan davlat – Yangi Oʻzbekistonni qurish gʻoyasi atrofida butun jamiyatimizni jipslashtiradi, – deydi А.Rahmonov. – Bosh qonunimizning matni xalqimizning fikri, takliflari bilan 2 bosqichda oʻrganildi va tayyorlandi. Birinchi bosqichda 60 mingdan ziyod takliflar kelib tushdi. Ikkinchi bosqichda ularning soni 2 mingtadan oshdi. Xalqaro huquqiy hujjatlar va 190 dan ortiq davlatlar tajribasi oʻrganildi.

Oʻzgarishlar qatoridan prezidentlik muddatini 5 yildan 7 yilga uzaytirish, senatorlar sonini 100 nafardan 65 nafarga tushirish, Oʻzbekistonni ijtimoiy davlat deb eʼlon qilish, mahalliy kengashlar va hokimlarning vakolatlarini bir-biridan ajratish oʻrin olgan. Аholi salomatligini asrash bilan bogʻliq normalar 4 barobar koʻpaytirilmoqda.

Bu onalar va bolalar oʻlimi, yuqumli kasalliklar tahdidini bartaraf etishda muhim ahamiyatga ega. Eng muhimi, inklyuziv taʼlimga ahamiyat qaratildi. Nogironligi bor bolajonlarimizga oʻz tengdoshlari bilan bir xil taʼlim olishi uchun barcha sharoitlar yaratilmoqda. Homilador yoki bolasi borligi sababli ayollarni ishga qabul qilishni rad etish, ishdan boʻshatish va ularning ish haqini kamaytirish taʼqiqlanishi belgilanmoqda.

Аlbatta, bu oʻzgarishlarning barchasi inson qadr-qimmatini oshirish, fuqarolarga munosib mehnat sharoitini yaratish, huquq va manfaatlarini taʼminlashga qaratilgandir. Oʻquv seminari davomida konstitutsiyaga kiritilgan oʻzgartirish va qoʻshimchalar haqida batafsil maʼlumot berildi. Ishtirokchilar oʻzlarini qiziqtirgan savollarga javob oldilar. Seminar yakunida faoliyati ijobiy deb baholangan shahar-tuman Kengashi raislari va Xalq deputatlari viloyat Kengashi deputati Sh.Karimov taqdirlandi.

“Аdolat” SDP Fargʼona viloyat Kengashi Matbuot xizmati.