Robaxon Maxmudova surxondaryolik saylovchilar bilan uchrashdi

Bugun Surxondaryo viloyati Termiz shahridagi “Sanʼat saroyi”da O‘zbekiston Respublikasi Prezidentligiga “Adolat” sotsial-demokratik partiyasidan ko‘rsatilgan nomzod Maxmudova Robaxon Anvarovnaning surxondaryolik saylovchilar bilan uchrashuvi bo‘lib o‘tdi.

Tadbirda partiya faollari, deputatlar, mehnat faxriylari, faol xotin-qizlar va yoshlar hamda ommaviy axborot vositalari vakillari ishtirok etdilar.

Tadbirni O‘zbekiston “Adolat” sotsial-demokratik partiyasi Surxondaryo viloyat Kengashi raisi Rustam Hamrayev kirish so‘zi bilan ochib berdi.

Shuningdek, tadbir davomida partiyadan Prezidentlikka nomzod Robaxon Maxmudovaning bosh ishonchli vakili tomonidan yig‘ilganlarga nomzod haqida batafsil maʼlumot berildi.

Shundan so‘ng nomzod dasturida ilgari surilgan 9 ta ustuvor maqsad, yaʼni “Huquqiy davlat qurish — pirovard maqsadimiz”, “Ijtimoiy adolatni va milliy iqtisodiyotimizning barqaror o‘sishini taʼminlaymiz”, “Ilm-fan, innovatsiyalar va taʼlim sohasining barqaror rivoji — taraqqiyotimiz kafolati”, “Aholi salomatligi — ulkan boylik” kabi yo‘nalishlarda qonun ustuvorligini taʼminlash, tibbiyot xodimlari va o‘qituvchi-pedagoglarning maqomini mustahkamlash, ularning mehnatini rag‘batlantirish, zamonaviy texnologiya va davolash usullarini keng joriy qilish, “Aqlli tibbiyot” tizimini shakllantirish vazifalari belgilanganligi alohida taʼkidlandi.

Nomzod dasturidan o‘rin olgan ijtimoiy sohaga oid takliflariga to‘xtalarkan, “Ijtimoiy davlat – 2030» dasturi va “Tibbiy yordamning kafolatlangan hajmi to‘g‘risida»gi qonunni qabul qilish, dorilarning yagona elektron bazasini takomillashtirish orqali ularning noqonuniy aylanmasiga, farmatsevtika va tibbiyot xodimlarining yashirin kelishuvlariga chek qo‘yish hamda narxlarning asossiz oshirilishining oldi olish, yo‘lsozlik sohasidagi ishlar sifati ustidan jamoatchilik nazoratini kuchaytirish masalalariga eʼtibor qaratdi.

Shuningdek, dasturda xotin-qizlarning jamiyat siyosiy hayotidagi faolligini oshirish, ularning yana-da chuqur bilim va kasb mahoratiga ega bo‘lishlari uchun keng imkoniyatlar yaratish, yuksak intellektual salohiyatga ega bo‘lgan ayollarni davlat boshqaruvi organlarining barcha sohalari va bo‘g‘inlariga jalb qilish, oilalarda teng huquqli va adolatli munosabatni, maʼnaviy-axloqiy muhitni mustahkamlash va sog‘lomlashtirishning samarali mexanizmlarini yaratishga oid takliflar ilgari surilayotganligi qayd etildi.

Uchrashuv davomida Xalq deputatlari Surxondaryo viloyat Kengashi deputati, O‘zbekiston Respublikasi Oliy Majlisining Inson huquqlari bo‘yicha Vakili (Ombudsman)ning Surxondaryo viloyati bo‘yicha mintaqaviy vakili, Termiz agrotexnologiyalar va innovatsion rivojlanish instituti dotsenti Abdurashid Artikov, Xalq deputatlari Jarqo‘rg‘on tuman Kengashi deputati, Jarqo‘rg‘on kichik biznes va yengil sanoat texnikumi direktori Qizlarshoy Raxmatova, “Amudaryo” bolalar sog‘lomlashtirish oromgohi direktori, partiya faoli Shohida Xolliyeva, Termiz davlat universiteti yuridik fakulteti 2- bosqich talabasi Davlatbek Abduqahhorovlar so‘z olib, Prezidentlikka nomzod Robaxon Maxmudovaning Saylovoldi dasturi xalqchil, yurtparvar g‘oya va maqsadlar jamlanmasi ekanligini eʼtirof etish barobarida, yig‘ilganlarni kutilayotgan muhim siyosiy, tarixiy tadbirda Robaxon Maxmudovaga ovoz berishga chaqirishdi.

Konstruktiv ruhda, qizg‘in savol-javoblarga boy bo‘lgan uchrashuv so‘nggida tadbir ishtirokchilari yurt ravnaqi, fuqarolar farovonligini taʼminlovchi muhim siyosiy tadbirlarda faol ishtirok etishlarini bildirishdi.

O‘zbekiston Respublikasi Prezidentligiga nomzod Robaxon Maxmudovaning saylovchilar bilan uchrashuvlari davom etadi.

O‘zbekiston “Adolat” SDP
Surxondaryo viloyat Kengashi matbuot xizmati