Samarqandda yoshlarni birlashtirgan “Cheksiz imkoniyatlar sammiti” oʻtkaziladi

Maʼlumki, oʻtgan asrga nisbatan sayyoramizda insoniyatning yashash tarzida misli koʻrilmagan oʻzgarishlar yuz bermoqda. Xususan, insoniyat sivilizatsiyasi tarixida hali mutlaqo kuzatilmagan global isish, dengiz va yer ekotizimlarining misli koʻrilmagan darajada kamayib borishi-yu, yer yuzining turli mintaqalarida qurgʻoqchilik, suv toshqinlari kabi bir qator salbiy holatlar yuzaga kelishi kuzatilmoqda.

Eng achinarlisi tabiiy ofatlar va texnogen fojialarning ortishi, davlatlar oʻrtasida boshlangan geosiyosiy va mafkuraviy ziddiyatlar butun bir mintaqalarning xavfsizligi va barqaror taraqqiyoti uchun jiddiy xavf solmoqda.

Bu jarayonda esa, dunyo aholisi kelajagiga befarq boʻlmagan davlatlar va xalqaro tashkilotlarning hamfikr boʻlib siyosat yuritishi har qachongidan-da muhim sanaladi. Shu bois, bugun koʻplab davlatlar qatori Oʻzbekiston ham xalqaro miqyosda aholi salomatligi va genofondiga ziyon yetkazadigan mavjud ekologik muammolarni bartaraf etish, ekstremizm va terrorizmga qarshi kurashishga qaratilgan bir qator tashabbuslarni ilgari surib kelmoqda.

Jumladan, joriy yil 2-mart kuni Boku shahrida bir qator davlatlar yetakchilari va xalqaro tashkilotlar rahbarlari ishtirokida boʻlib oʻtgan Qoʻshilmaslik harakati Muloqot guruhining navbatdagi sammitida ham davlatimiz rahbari tomonidan qator tashabbuslar ilgari surildi.

Prezidentimiz dastlab, soʻnggi yillarda insoniyat pandemiyaga qarshi kurashish bilan bir qatorda, iqlim oʻzgarishi, tabiiy ofatlar va texnogen fojialarning ayanchli oqibatlarini ham oʻz boshidan oʻtkazayotgani, bu muammolarning koʻlami tobora kengayib, ular nafaqat ayrim davlatlar, balki butun bir mintaqalarning xavfsizligi va barqaror taraqqiyoti uchun jiddiy xavf solayotganligini alohida taʼkidlab oʻtdi.

Albatta, bunday qiyin va murakkab sinovlarni faqatgina birgalikda, tomonlar bir-birlarini yaqindan qoʻllab-quvvatlagan holda yengib oʻtishi mumkin. Shu maʼnoda, Oʻzbekiston 2030-yilga qadar moʻljallangan Senday hadli dasturining asosiy maqsadlariga erishish boʻyicha Global platforma faoliyatini yanada kuchaytirish tarafdoridir.

Yuqoridagi kabi holatlarni oʻz vaqtida tahlil qilish va oldini olish maqsadida Prezidentimiz Qoʻshilmaslik harakatining maxsus monitoring va ilmiy-tadqiqot tarmogʻini tashkil qilishni taklif qildi va bu institutni Oʻzbekistonda joylashtirishga tayyor ekanligimizni bildirdi.

Shuningdek, soʻnggi paytlarda barcha davlatlarda oʻsib borayotgan terrorizm va ekstremizmning xavf-xatariga qarshi Tashkilot doirasida amaliy aloqalarni kuchaytirish tobora dolzarb tus olayotgani bois, ana shunday tahlikali vaziyatda Qoʻshilmaslik harakatini terrorizmning har qanday koʻrinishiga qarshi kurashning xalqaro-huquqiy bazasini mustahkamlash boʻyicha umumiy intilishlarga yetakchilik qilishi lozimligi taʼkidlandi.

Yigʻilishda mintaqaviy va xalqaro darajadagi uchrashuvlarda Oʻzbekiston tomonidan doimiy tashabbus qilib kelinayotgan Afgʻoniston masalasiga ham toʻxtalib oʻtildi. Jumladan, tashkilot aʼzolarini afgʻon masalasi boʻyicha algoritmni kelishish uchun BMT huzurida Xalqaro muzokaralar guruhini tuzishga doir Oʻzbekiston taklifini qoʻllab-quvvatlashga chaqirdi.

Bundan tashqari, sammitda oziq-ovqat mahsulotlari, suv va energetika resurslarining tobora taqchil boʻlib borayotgani mamlakatlarimiz ijtimoiy-iqtisodiy tizimlari uchun jiddiy sinov boʻlayotganligiga ham alohida eʼtibor qaratildi.

Shu bois, davlatimiz rahbari mazkur sammit kabi nufuzli anjumanlar birinchi navbatda oʻzaro amaliy hamkorlikni rivojlantirish, qoʻshma dasturlar va yirik loyihalarni ilgari surish uchun keng iqtisodiy imkoniyatlar eshigini ochib berishi lozimligi hamda tashkilot sammitlari arafasida Qoʻshilmaslik harakati Iqtisodiy forumini muntazam oʻtkazib borishni taklif etdi.

Yuqoridagi kabi global sharoitlarda yoshlarga eʼtiborni har qachongidan-da kuchaytirish nafaqat ularni yot gʻoyalar taʼsiridan asrashga shu bilan birga, muammolarni samarali hal etishda muhim rol oʻynaydi. Boisi, bugun global muammolarni hal etishda intellektual yuqori salohiyatga ega boʻlgan yosh kadrlar tajribasi muhim sanaladi.

Shuningdek, bunday yoshlarni bir maqsad yoʻlida birlashtirish ahamiyati har qachongidan-da yuqori boʻlganligi bois davlatimiz rahbari harakat yoshlarini birlashtirgan “Cheksiz imkoniyatlar sammiti”ni kelgusi yil jahon sivilizatsiyasi markazlaridan biri boʻlgan koʻhna Samarqandda tashkil etish taklifini bildirdi. 

Oltinoy Mamirova,
Oliy Majlis Qonunchilik palatasi deputati