Saylovda ilk bor ovoz beruvchi yoshlar deputat tomonidan taqdirlandi

Oliy Majlis Qonunchilik palatasi deputati Muhammad Valiyev Qoʻqon shahrining 25-sonli umumtaʼlim maktabida targʻibot tadbiri oʻtkazdi. “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasi mazmun-mohiyatiga bagʻishlangan tadbirda shahar IIB boshligʻi, podpolkovnik Nurillo Sultonov, hududdagi mahalla hamda maktab faollari ishtirok etdi. Tadbir davomida yangilanayotgan Konstitutsiyada barcha sohalarda oʻzgarishlar koʻzda tutilgani, bosh Qomusimiz tom maʼnoda xalq Konstitutsiyasi boʻlayotgani haqida soʻz yuritildi.

– Har bir davlatning Konstitutsiyasi uning milliy manfaatlari va xalqining xohish-irodasi, orzularini ifoda etadi, – deydi deputati Muhammad Valiyev. – Bizning Konstitutsiyamizda ham kelajagimiz, Vatanimiz istiqboli aks etadi. Unda jamiyatimizning har bir qatlami manfaatlari inobatga olingan. Xotin-qizlar, yoshlar, oila munosabatlari ayniqsa, inson shaʼni va qadr-qimmati ustuvordir. Har birimiz buni anglagan holda referendumda faol ishtirok etishimiz lozim.

Shuningdek, referendumda ishtirok etuvchi ilk saylovchi yoshlar hamda mazkur maktabning eng aʼlochi oʻquvchilari deputat tomonidan esdalik sovgʻalari bilan taqdirlandi.

Mazkur mazmundagi tadbir 14-sonli umumtaʼlim maktabi oʻqituvchi va oʻquvchilari ishtirokida ham oʻtkazildi.

“Аdolat” SDP Fargʻona viloyat Kengashi
Matbuot xizmati.