Shahnoza Gʻanieva – endi partiyaning Fargʻona viloyat Kengashi raisi

“Аdolat” SDP Fargʻona viloyat Kengashining navbatdan tashqari Plenum yigʻilishi boʻlib oʻtdi. Unda tashkiliy masala koʻrib chiqildi. Plenumda partiya Siyosiy Kengash raisi oʻrinbosari А.Rahmonov ishtirok etdi va soʻzga chiqdi.

– Bugungi kunga qadar partiya faoliyatini jonlantirish, respublika miqyosida obroʻ-eʼtiborini oshirish, saylovchilar bilan tizimli ishlash yoʻlida viloyat Kengashi xodimlari sidqidildan mehnat qildilar, – deydi rais oʻrinbosari oʻz soʻzida. – Saylovchilar tomonidan siyosiy partiyalarga qoʻyilayotgan talablar, jamiyatimiz qonunchiligida olib borilayotgan islohotlar va oʻzgarishlar bizdan yangidan-yangi tashabbuslar ustida ishlash va ularning ijrosini amalda tatbiq etishni taqozo etmoqda. Oʻylaymanki, jamoa yangi rahbar bilan yanada samarali mehnat faoliyatini olib boradi.

Plenumda Kengash aʼzolari tomonidan partiya viloyat Kengashi raisligiga shu kungacha partiya viloyat Kengashi Аyollar qanoti raisi, “Fargʻona ibratli begim” masʼuliyati cheklangan jamiyati rahbari Shahnoza Gʻanieva Maʼmirovna nomzodi ilgari surildi va bir ovozdan maʼqullandi.

Maʼlumot oʻrnida, Shahnoza Gʻanieva Maʼmirovna 1984 yil 10 martda Fargʻona viloyatining Fargʻona shahrida tugʻilgan. 2015 yilda Fargʻona davlat universitetini tamomlagan, mutaxassisligi tarixchi. Oilali, 3 nafar farzandning onasi.

U 2005 yildan buyon Fargʻona “Ibratli begim” nodavlat taʼlim muassasasi, Fargʻona “Roza-Аl” xususiy korxonasi rahbari sifatida faoliyat yuritib kelmoqda. 2015 yildan boshlab “Аdolat” SDP Fargʻona shahar, viloyat Kengashi qoshidagi Аyollar qanoti raisi vazifasida ishlab kelgan.

“Аdolat” SDP Fargʻona viloyat Kengashi Matbuot xizmati.