Siz, yoshlardan umidimiz katta. Barchangizga omad yor boʻlsin, Qadrli “Yoshlar parlamenti” aʼzolari!

Mamlakatimizda joriy yilning yanvar-fevral oylarida Oʻzbekiston Respublikasi Oliy Majlisi Qonunchilik palatasi huzuridagi “Yoshlar parlamenti” aʼzoligiga boʻlib oʻtgan saylovda ishtirok etgan barcha salohiyatli, kuchli, tashabbuskor, shijoatli, Vatanim ravnaqi uchun oʻz hissamni qoʻshaman deb koʻzi yonib turgan yoshlarimizga oʻz minnatdorchiligimni bildirib, oʻzaro sogʻlom raqobat asosida “Yoshlar parlamenti” aʼzoligiga saylanganlarni samimiy muborakbod etaman.

Oʻzbekiston Respublikasi Oliy Majlisi Qonunchilik palatasining Yoshlar masalalari boʻyicha Respublika komissiyasi tomonidan oʻtkazilgan yigʻilishda Yoshlar parlamentiga siyosiy partiyalar tomonidan saylangan nomzodlar Respublika komissiyasi tomonidan tasdiqlandi.

“Yoshlar parlamenti”ning birinchi chaqiriq aʼzolariga 2 yarim yil davomida koʻrsatgan faolliklari, yurtimizda qonun ustuvorligiga erishish, yoshlarga oid davlat siyosatini amalga oshirishda befarq boʻlmasdan, oʻz atrofida iqtidorli yoshlarni birlashtirib, mamlakatimiz kelajagi yoʻlida qilgan xizmatlari uchun alohida minnatdorchilik bildiraman. Sizlar Yoshlar parlamentining birinchi qaldirgʻochlari sifatida yodga olinasiz. Barchangizga kelgusi faoliyatingizga omad va zafarlar tilayman. Yuksak marralarga erishganingizni koʻrib, sizlar bilan faxrlanaylik.

“Yoshlar parlamenti”ning yangi saylangan aʼzolariga yurtimiz taraqqiyoti yoʻlida birlashib, birgalikda, hamjihatlikda faoliyat yuritib, yanada ulkan natijalarga erishishingizga ishonaman. Zero Sizlar, eng tashabbuskor, keng dunyoqarash, chuqur bilim, tafakkur hamda liderlik qobiliyatiga ega boʻlgan, turli yoʻnalishlarda Vatanga sadoqat bilan xizmat qilib, taʼlim olib kelayotgan oʻgʻil-qizlarsizlar. Yurtimizni sizdan umidi juda katta. Barchangizga omad yor boʻlsin!

Bahrom Abduhalimov,
Oʻzbekiston “Adolat” SDP
Siyosiy Kengashi raisi.