Sport-ta’lim muassasalari faoliyati yanada yaxshilanadi

2023 yil 10 iyul kuni Oliy Majlis Qonunchilik palatasidagi “Adolat” SDP fraksiyasining navbatdagi yig‘ilishi bo‘lib o‘tdi. Unda fraksiya a’zolari tomonidan “O‘zbekiston Respublikasining Bojxona kodeksiga qo‘shimcha kiritish to‘g‘risida”gi qonun loyihasi ikkinchi o‘qishda qizg‘in muhokama qilindi.

Qayd etilganidek, so‘nggi yillarda xalqimizning salomatligi to‘g‘risida g‘amxo‘rlik qilish, ma’naviy va jismoniy barkamol avlodni shakllantirish, aholini, ayniqsa, yoshlarni sportga keng jalb etish bo‘yicha qator ishlar amalga oshirilmoqda.

Qonun loyihasida belgilanayotgan normalar jismoniy tarbiya va sport sohasida nodavlat ta’lim xizmatlari ko‘rsatish bo‘yicha faoliyatni rivojlantirishga, iqtidorli sportchilarni saralab olish (seleksiya) hamda tayyorlashda davlat va nodavlat ta’lim tashkilotlari o‘rtasida sog‘lom raqobat muhitining, shuningdek, nodavlat sport-ta’lim xizmatlarini ko‘rsatayotgan tashkilotlar uchun qulay shart-sharoitlarning yaratilishiga xizmat qiladi.

Yig‘ilishda fraksiya a’zolari partiya saylovoldi dasturidagi maqsad va g‘oyalardan kelib chiqqan holda mazkur qonun loyihasi muhim konseptual hujjat ekanligi, ushbu yo‘nalishdagi qonunchilikning uzviyligi va davomiyligini ta’minlashda alohida ahamiyat kasb etishini ta’kidlab, har jihatdan mukammal qonun holatiga keltirilganligi alohida e’tirof etildi.

Majlisda deputatlar tomonidan partiya pozitsiyasidan kelib chiqqan holda ko‘tarilgan savollar hamda takliflar yuzasidan tashabbuskorlar va soha mutaxassislari tomonidan javoblar olinib, mazkur qonun loyihasi ikkinchi o‘qishda ma’qullandi.

Yig‘ilishda kun tartibiga kiritilgan boshqa masalalar ham atroflicha ko‘rib chiqilib, fraksiyaning tegishli qarori qabul qilindi.