Ta’lim sifati –Yangi O‘zbekiston taraqqiyot yo‘li   

“Adolat” SDP Qamashi  tuman  Kengashi tomonidan  “Ta’lim sifatini oshirish-Yangi O‘zbekiston taraqqiyotining yagona yo‘li”  mavzuida davra suhbati tashkil etildi. Tuman xalq ta’limi bo‘limi tadbirgohida bo‘lib o‘tgan tadbirda partiya faollari, o‘qituvchilar va mahalliy Kengash deputatlari qatnashdi. Tadbirda xalq deputatlari tuman Kengashi deputati  Abdurasul Bozorov ta’lim sifati va samaradorligini oshirish  xususida ma’ruza qildi.

-Davlatimiz rahbari pedagoglar bilan har gal yuzma-yuz muloqot qilganlarida  maktablarda ta’lim sifati hamda jamiyatda o‘qituvchi kasbi nufuzini oshirish, sharoitlarini yaxshilash   eng asosiy vazifalarimizdan biri ekanligini alohida e’tirof etadilar ,- dedi Abdurasul Bozorov.- Mamlakatimizdagi barcha ta’lim muassasalarida   ikki smenalik ta’limni yo‘qotib bir smenali ta’limga o‘tilishi, milliy o‘zligimiz timsoli, ma’naviyatimiz asosi bo‘lgan ona tilimizga e’tibor yanada kuchaytirilishi  ham yuksak e’tibor namunasidir.  Albatta, chet tilini bilish — zamon talabi, ammo ona tilini bilishga majbur qilish kerakligi, o‘qituvchilarning maqomini, ularning sha’ni va qadr-qimmatini himoya qilish Prezidentimiz tashabbuslari bilan  Konstitutsiyada alohida belgilanganini mamnuniyat bilan ta’kidlash o‘rinlidir.

 -Prezidentimiz  viloyatimizga tashriflari chog‘ida ham  ta’lim sifatini oshirish – Yangi O‘zbekiston taraqqiyotining yakkayu yagona to‘g‘ri yo‘li ekanligini  alohida  ta’kidlab o‘tgandilar,-dedi partiya faoli Saodat Otaqulova.- Hozir  boshlang‘ich sinflarda mutlaqo yangi metodika asosida yaratilgan darsliklar bo‘yicha o‘qitish yo‘lga qo‘yildi. Barcha  maktablarda  bepul ovqatlanish joriy etiladi. Haqiqatdan ham, mamlakatimiz kelajagi, endigi taraqqiyoti bevosita innovatsion omillarga, pirovardida, sifatli ta’limga bog‘liq bo‘lib qolmoqda. Shu tufayli fan, ta’lim sohasida boshlangan islohotlarni jadal davom ettirish, ta’lim dargohlariga borib, o‘qituvchi va murabbiylar bilan ko‘proq muloqot qilib, o‘quv-tarbiya ishlari sifatini oshirish bo‘yicha qo‘yilgan masalalarni birgalikda hal etish zarur.Tadbirda mamlakatimizda Yangi O‘zbekiston bunyodkorlari bo‘lgan o‘quvchilar zo‘r bilimga ega bo‘lishi kerakligi ta’kidlandi. Albatta  buning uchun o‘qituvchi ham bilimdon bo‘lishi lozim. Endi o‘qituvchilarni diplomi bo‘yicha band qilish emas, bilimi, mahorati va saviyasini inobatga olib ishga olish zarur. Pedagogning mavqeini ko‘tarish deganda mas’uliyatini ham oshirish nazarda tutiladi.

Zamon talabiga javob beradigan innovator kadrlarni tayyorlash uchun birinchi galda muallimning o‘zi ham yangilikka intiluvchan bo‘lishi kerak. Bugun ta’lim muassasalari nafaqat davlatning, balki hammaning diqqat markazida bo‘lishi lozimligi tadbirda alohida qayd etildi.

Kun tartibidagi masala yuzasidan so‘zga chiqqanlar ta’lim sifati, pedagogning mas’uliyati Yangi O‘zbekiston taraqqiyotining muhim omiliga aylanishi uchun hali ancha ish qilishi  lozimligi yuzasidan o‘z fikr mulohazalarini bildirdilar. Ta’lim sifatini yanada oshirish yuzasidan tegishli vazifalar belgilab oldilar.

 Xushnoza Baratova,

         “Adolat” SDP Qashqadaryo viloyat Kengashi faoli.