Taraqqiyot yoʻlida birlashaylik!

Tiriklik charhi aylanib, zamonning yangi qiyofalarini kashf etaveradi. Momolarimiz, bobolarimiz orzu qilgan tinch va osuda zamonlarga erishdik. Bugun Oʻzbekiston davlati erishayotgan har sohadagi yutuqlar dunyo hamjamiyati eʼtirofida. Shunday yurtni qadrlash, eʼzozlash har bir yurtdoshimizning burchiga aylanmogʻi darkor.

Bagʻdod tumanidagi “ Ultarma” MFYda   “Adolat” SDP tuman Kengashi raisi Eʼzozaxon Abduvalieva tomonidan tashkil etilgan “Tinchlik, farovonlik va taraqqiyot yoʻlida birlashaylik!” loyihasi ham xalqni yanada birdamlikka chorladi. Yangi konstitutsiyamizning hamjihatlik va birdamlikda qabul qilinishi, unda davlatimizni ijtimoiy davlat sifatida eʼtirof etilishi, inson huquq va manfaatlarining ustuvorligi, inson qadri ulugʻlanishi, qadrini qaddidan-da ulugʻvor bilguvchi elimizni koʻnglidagi ezgu istaklar edi. Ana shu buyuk maqsadlar sari qoʻyilgan yana bir qadam Yangi Oʻzbekistonning taraqqiyotini yana yuksaklarga koʻtarishga qodir davlat rahbarini 9-iyul kuni muddatidan avval oʻtkaziladigan Prezident saylovida saylab olishdir. Huquqshunoslar, siyosatchilar ishtirokidagi uchrashuv bahs –munozaralarga boy boʻldi. Barcha ishtirokchilarning istagi esa albatta yagona.

Birdamlikda saylovlarda faol ishtirok etib, oʻz ovozi bilan vatan ravnaqiga munosib ulush qoʻshish. Yurtga, vatan taqdiriga daxldorlik esa insonni hamisha ezgulik manzillarida birdamlikka undaydi.

“Adolat” SDP

Fargʻona viloyat kengashi Matbuot xizmati.