Targʻibot tadbirlari davom etmoqda

“Mening konstitutsiyam – mening kelajagim” shiori bugun barcha hamyurtlarimizning tilida, dilida aks etmoqda. Zotan, bosh qomusimizning zamon bilan hamnafaslikda isloh qilinishi, jamiyatimiz rivojiga monand shakllanishi har bir fuqaroning ertasi uchun juda muhim. Аytish mumkinki, bu oʻzgarishlar ijtimoiy-iqtisodiy, siyosiy jarayonlar, sohalarning barcha tarmoqlariga yangi nafas olib kiradi. Shuning uchun Bosh qonunimizning mohiyatini aholi oʻrtasida keng targʻib etish, ularning xabardorligini oshirish ahamiyatlidir.

Fargʻona jamoat salomatligi tibbiyot institutida oʻtkazilgan mazkur mazmundagi tadbirda xalq deputatlari shahar Kengashi deputati Bunyod Аhmadaliyev ishtirok etdi hamda yangilanayotgan bosh qomusimizdagi mezonlar xususida batafsil maʼlumot berdi.

Partiyaning Furqat tuman Kengashi raisi Nodirbek Olimov tomonidan tumandagi 8-sonli umumtaʼlim maktabida partiya faollari ishtirokida oʻtkazilgan “Konstitutsiyaviy islohotlar – davr talabi” mavzusidagi ochiq muloqotda qatnashchilar oʻzlarini qiziqtirgan savollarga javob olishdi.

— Konstitutsiyaviy oʻzgarishlar mamlakatimizning rivojlanishidan kelib chiqib, zamon talabiga aylandi. Ilgari amal qilib kelgan “davlat-jamiyat-inson” tamoyili “inson-jamiyat-davlat” deb oʻzgartirilishi inson manfaatlarini har narsadan ustun ekanligidan dalolatdir, — deydi Kengash raisi.

Partiyaning Quva tuman Kengashi raisi Shohista Mamajonova esa “Oltiariq” MFYdagi oilaviy poliklinika xodimlariga “Konstitutsiya – baxtimiz poydevori” mavzusida maʼruza qildi.

Xalq deputatlari Fargʻona tuman Kengashi deputatlari O.Dadajonova, F.Mirzaev Xalq deputatlari Fargʻona shahar Kengashi deputati O.Xoliqov bilan birgalikda tumandagi 39-sonli maktabda boʻlishdi. Taʼlim dargohida faoliyat koʻrsatayotgan pedagog-xodimlar bilan “Konstitutsiyani takomillashtirish – davr talabi” mavzusida suhbatlashildi.

Suhbat davomida 30-aprel kuni boʻlib oʻtadigan Referendumda faol ishtirok etib, har kim oʻzining ertangi kuni uchun ovoz berishi lozimligi taʼkidlandi.

“Аdolat” SDP Fargʻona viloyat Kengashi
Matbuot xizmati.