Tarixiy voqelik arafasidagi muloqotlar

“Adolat” SDP tomonidan “Oʻzbekiston Respublikasi Konstitutsiyasi toʻgʻrisida”gi Kons­titutsiyaviy qonun loyihasining mazmun-mohiyatini aholiga sodda va toʻgʻri tushuntirishga bagʻishlangan davra suhbatlari, uchrashuvlar mamlakatimiz boʻylab davom etmoqda.

Ushbu tadbirlarning navbatdagisi Qoraqalpogʻiston Respublikasi, Xorazm, Toshkent, Namangan viloyatlari va Toshkent shahrida boʻlib oʻtdi.

Qoraqalpogʻiston Respublikasi. “Adolat” SDP Siyosiy Kengashi raisi Bahrom Abduhalimov partiyaning Qoraqalpogʻiston Respublikasi hududiy Kengashiga tashrif buyurdi.

Tashrif davomida partiyamiz yetakchisi hududiy Kengash xodimlari va ularning ish faoliyati bilan yaqindan tanishdi, Kengash Ijroiya qoʻmitasining 2022-yildagi faoliyati hamda “Insonga eʼtibor va sifatli taʼlim yili”da amalga oshiriladigan ustuvor vazifalarga eʼtibor qaratdi.

Bahrom Abduhalimov oʻz chiqishida Oʻzbekis­ton Respublikasi Konstitutsiyasi qonun loyi­hasini tayyorlashda “Adolat” sotsial-demok­ratik partiyasining salmoqli ishtirokini hamda 30-aprel kuni oʻtkaziladigan umumxalq referendumi barchamiz uchun tarixiy voqea ekanligini alohida taʼkidlab oʻtdi.

Tashrif yakunida partiya Siyosiy Kengashi raisi amalga oshirilgan ishlar hamda kelgusi rejalar bilan tanishib, hududiy Kengash saʼy-harakatlariga ijobiy baho bergan holda, barchani targʻibot-tashviqot ishlarida yanada faol boʻlishga chaqirdi.

Qoraqalpogʻiston Respublikasi

Kengashi matbuot xizmati

* * *

Xorazm. Toshkent Tibbiyot akademiya­­si Urganch filialida “Adolat” SDP Siyo­siy Kengashi raisi Bahrom Abduhalimov, Oliy Majlis Qonunchilik Palatasi deputati Maqsud Qurbonboyev ishtirokida “Konstitutsion islohotlar – inson qad­ri uchun” mavzusida maʼnaviy-maʼrifiy tadbir tashkil etildi. Tadbirda partiya faollari, deputatlar, BPT, “Ayollar va yoshlar” qanoti raislari, yosh adolatchilar, mazkur oliygohda taʼlim olayotgan talabalar, professor-oʻqituvchilar hamda ommaviy axborot vositalari vakillari ishtirok etishdi.

Tadbirni “Adolat” SDP Xorazm viloyat kengashi raisi Tohir Polvonov kirish soʻzi bilan ochib berdi.

Partiya Siyosiy Kengashi raisi Bahrom Abdu­halimov soʻzida Bosh qomusimizga kiritilayotgan oʻzgartishlarning mazmun-mohiyati, ilm-fan, taʼlim rivojiga oid muhim jihatlari, Asosiy qonunning huquqiy-demokratik jamiyatni barpo etishdagi muhim omillari, inson qadri tamoyilini yanada mus­tahkamlash, ayniqsa, yoshlar masalasiga doir kiritilayotgan moddalar har bir unib-oʻsib kelayotgan yoshning kelajagi mustahkamlanayotganidan dalolat ekanini asosli misollar bilan tushuntirdi va slaydlar orqali ishtirokchilar eʼtiboriga havola etdi.

OMQP deputati M.Qurbonboyev soʻzida Kons­titutsiyaga oʻzgartish va qoʻshimchalar kiritilayotgani zamirida jamiyat hayotini yanada demokratlashtirish asosiy maqsad qilib olingani va har bir fuqaroning huquq va erkinliklarini toʻliq kafolatlaydigan yangi Qomusimiz shakllanayotgani va Konstitutsiyaga kiritilgan bir qator yangi moddalar toʻgʻrisida gapirdi.

TTA Urganch filiali direktori Rashid Roʻzi­boyev partiyaning Saylovoldi dasturida ilgari surilgan asosiy masalalar va partiya tomonidan olib borilayotgan saʼy-harakatlarga ijobiy munosabat bildirdi. Yangilanayotgan Konstitutsiya xalqchil va hayotiyligi bilan keng omma orasida qoʻllab-quvvatlanayotganida partiyaning oʻrni beqiyos ekanini bir qator misollar bilan taʼkidlab oʻtdi va oliygoh jamoasi va talabalari bilan birgalikda referendumda faol ishtirok etishini bildirdi.

– Partiyamiz yetakchisining biz, yoshlarga yangi tahrirdagi Konstitutsiyamiz toʻgʻrisida bergan tushunchalari kons­titutsiyaviy bilimlarimizni yanada boyitishi bilan bir qatorda, yurtimiz kamoli uchun shijoat bilan mehnat qilishga undadi, – deydi “Yoshlar parlamenti” aʼzosi Toʻxtajon Quryazova. – Yangilanayotgan Konstitutsiyamiz matni bilan yaqindan tanishar ekanmiz, uning partiyamiz Saylovoldi dasturida ilgari surilgan koʻp­lab gʻoyalar bilan hamohang ekanidan qalbimiz gʻururga toʻldi.

– Yangilanayotgan Konstitutsiyamiz toʻgʻrisidagi maʼlumotlardan soʻng zimmamizga katta masʼuliyat yuklanganini his etdim, – deydi tadbir ishtirokchisi, boʻlajak shifokor Zaynab Rahimboyeva. – Toʻgʻri, davlatimiz tomonidan yoshlarga qaratilgan eʼtibor eʼtirofga loyiq. Yangilanayotgan Konstitutsiyada bu imkoniyatlar yanada takomillashib, mus­tahkamlanayotgani har bir oʻgʻil-qiz baxt­­li kelajak bilan taʼminlanishiga kafolat, deganidir. Bunga javoban biz, yoshlar yuqori bilim va salohiyatga ega boʻlib shakl­lanishimiz uchun oʻz ustimizda yanada koʻproq ishlashimiz, mehnat qilishimiz, yangi Oʻzbekistonimizni barpo qilishda bor isteʼdodimizni safarbar etishimiz, referendumda faol ishtirok etishimiz lozim.

Shuningdek, B.Abduhalimov Xorazm Maʼmun akademiyasida ham boʻlib, mazkur mas­kanda olib borilgan qurilish va taʼmirlash ishlari bilan yaqindan tanishdi. Akademiya qoshida tashkil etilgan yangi va turli adabiyotlar bilan boyitilgan kutubxona, muzey ekspozitsiya­dagi oʻzgarish­lar, barcha talab­larga javob beradigan zamonaviy bino, laboratoriya­lar faoliyati bilan tanishgandan soʻng, akademiya jamoasini dildan qutladi va kelgusi ishlarida muvaffaqiyatlar tiladi. Oʻrganish davomida akademiyaning moddiy-texnik bazasini yanada yaxshilash, olimlarga qulay shart-sharoitlar yaratish, kutubxona va muzeyni yangi kitoblar va eksponatlar bilan boyitish va boshqa masalalar yuzasidan kelishib olindi.

Shunday soʻng akademiya olimlari bilan “Yangilanayotgan Konstitutsiya – taraqqiyot garovi” mavzusida davra suhbati tashkil etildi. Tadbirni Maʼmun akademiyasi raisi Ikrom Abdullayev kirish soʻzi bilan ochib berdi.

B.Abduhalimov oʻz chiqishida mamlakatimizning ijtimoiy-siyosiy taraqqiyotida olimlarning oʻrni beqiyosligiga alohida eʼti­bor qaratdi.

Uchrashuvda olimlar oʻzlarini qiziqtirgan savollarga atroflicha javob oldilar.

Shubhasiz, partiyamiz yetakchilari va faollari tomonidan oʻtkazilayotgan bu kabi tadbirlar joriy yilning 30-aprel kuni boʻlib oʻtadigan referendumda keng jamoatchilikning faol ishtirokini taʼminlashda alohida ahamiyat kasb etadi.

Zamira ABDULLAYEVA,

Xorazm viloyat kengashi matbuot kotibi

* * *

Toshkent viloyati. “Adolat” SDP Markaziy apparati hamda partiyaning Toshkent viloyati kengashi tashab­busi bilan Chirchiq shahridagi Chirchiq davlat pedagogika universitetining yigʻinlar zalida “Oʻzbekiston Res­publikasi Konstitutsiya­­si toʻgʻrisida”gi Oʻzbekiston Respublikasi Konstitutsiyaviy qonuni loyihasini qoʻllab-quvvatlash va boʻlib oʻtishi kutilayotgan referendumga munosib tayyorgarlik koʻrish, aholi oʻrtasida yanada samarali targʻibot-tashviqot ishlarini amalga oshirish, partiyaning jarayonda faol ishtirok etishini taʼminlash maqsadida tadbir oʻtkazildi.

Tadbirda “Adolat” SDP Siyosiy Kengashi raisi Bahrom Abduhalimov, partiyaning Toshkent viloyati kengashi raisi Farmon Allayev, partiya Siyosiy Kengashi Markaziy apparati hamda hududiy, mahalliy kengashlar xodimlari, partiyaning “Yosh adolatchilar” qanoti raislari, Yoshlar parlamenti aʼzolari, xalq deputatlari Toshkent viloyati va mahalliy kengashlaridagi partiya deputatlari, jamoatchilik vakillari hamda universitetning oʻqituvchi va talabalari, OAV xodimlari ishtirok etishdi.

Davra suhbatida soʻz olgan “Adolat” SDP Siyosiy Kengashi raisi Bahrom Abduhalimov “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Kons­titutsiyaviy qonuni loyihasini qoʻllab-quvvatlarkan, bu boradagi oʻz fikr-mulohazalari bilan oʻrtoqlashdi.

Taʼkidlanganidek, yangilanayotgan Konstitutsiyamizda birgina yoshlarning huquq va erkinliklarining kafolatlanishi borasidagi normalar soni ikki baravarga oshmoqda. Xususan, kiritilayotgan konseptual oʻzgarish­lar qatorida jamiyatning yarmidan koʻpini tashkil qiladigan yoshlarga munosib hayot sharoiti yaratish, barqaror iqtisodiyot, xavfsiz davlat, samarali boshqaruv, ijtimoiy kafolatlar yanada mustahkamlanmoqda.

Bundan tashqari, yoshlarning taʼlim olishi, ijtimoiy va tibbiy himoyasi, uy-joyli boʻlishi, bandligi uchun shart-sharoitlar yaratish – davlatning konstitutsiya­viy majburiyati sifatida belgilanayotganligi, mazkur normalar, nafaqat yoshlar manfaati, balki butun jamiyatimiz va mamlakatimizning kelgusi taqdiri uchun muhimdir.

Tadbirda xalq deputatlari Toshkent viloyati hamda mahalliy kengash deputatlari soʻzga chiqib, Konstitutsiyaga kiritilayotgan oʻzgarishlar xususida oʻz fikr va munosabatlarini bildirishdi.

Ravshan MIRZAQULOV,

Toshkent viloyati kengashi matbuot kotibi

* * *

Namangan davlat universiteti katta majlislar zalida umumxalq referendumiga bagʻish­lab tashkil etilgan tadbirda “Adolat” SDP viloyat, shahar va tuman kengashlari raislari, xalq deputatlari mahalliy kengashlarining deputatlari, “Ayollar” va “Yosh adolatchilar” qanotlarining faollari, universitet professor-oʻqituvchilari, talabalar, keng jamoatchilik va omma­viy axborot vositalari vakillari ishtirok etdi.

“Konstitutsiyaviy islohotlar – inson shaʼni va qadr-qimmati uchun” deb nomlangan davra suhbatini “Adolat” SDP viloyat kengashi raisi Isroiljon Joʻrayev olib bordi.

“Adolat” SDP Siyosiy Kengashi raisi Bahrom Abduhalimov kirish soʻzi bilan muloqotni boshlab berdi. U yangi tahrirdagi Asosiy qonun loyihasi xalqimizning faol ishtirokida tayyorlanganligini, unda 220 mingdan ortiq taklif va mulohazalarda bildirilgan fikrlar oʻz ifodasini topganligini qayd etdi. Shuning uchun bu hujjatni umumxalq ijodining mahsuli sifatida baholash mumkin. Bosh Qomus loyi­hasida jamiyatimizning barcha tabaqalari manfaatlari toʻla hisobga olingan. Unda oʻz aksini topgan qoidalar fuqarolarimizning huquq va burchlari uygʻunligini taʼminlashga xizmat qiladi.

Oliy Majlis Qonunchilik palatasi deputati Dilmurod Ismoilov “Ijtimoiy davlat inson huquq va manfaatlari koʻzgusi”, NamDU rektorining birinchi oʻrinbosari Narimon Dehqonov “Xalq – Kons­titutsiyaviy islohotlar tashabbuskori” mavzularida maʼruzalar bilan chiqdilar. Ular yangilanayotgan Konstitutsiyada inson qadr-qimmati eng asosiy masala etib belgilanayotganini alohida taʼkidladilar. Bosh qomusimizga kiritilayotgan oʻzgartish­larning mazmun-mohiyati, ilm-fan, taʼlim rivojiga oid muhim jihatlari, demokratik jamiyat barpo etishdagi muhim omillari, inson qadri tamoyilini yanada mustahkamlash, ayniqsa, yoshlar masalasiga doir kiritilayotgan oʻzgartirishlar Oʻzbekistonning ijtimoiy davlatga aylanishiga mustahkam zamin boʻlishi misollar bilan izohlandi.

Shundan soʻng soʻzga chiqqan Namangan davlat universiteti tabiiy fanlar fakulteti dekanining oʻrinbosari Abdulbosit Sobirxonov, Oliy Majlis Qonunchilik palatasi Yoshlar parlamenti aʼzosi Nozima Akbarova, xalq deputatlari Pop tuman kengashi deputati Maftunaxon Mamatova Kons­titutsiyaga kiritilayotgan oʻzgartishlar jamiyat hayotini yanada demok­ratlashtirishi, har bir fuqaroning huquq va erkinliklarini toʻliq kafolatlashini bayon etdilar. Bu “Adolat” SDPning Saylov­oldi dasturida olgʻa surilgan gʻoya va maqsadlar bilan hamohangligi taʼkidlandi.

Tadbir qatnashchilari barchani shu yil 30-aprelda oʻtkaziladigan umumxalq referendumida faol qatnashishga chaqirdilar.

Nurbek ABDULLAYEV,
Namangan viloyat kengashi matbuot kotibi