Tibbiyotchilar islohotlardan mamnun

Yangilanayotgan Konstitutsiyamizda inson salomatligi masalasi dolzarb vazifalardan biri sifatida oʻz ifodasini topmoqda. Bu ayni vaqtda tibbiyot xodimlari zimmasidagi masʼuliyatni yanada oshiradi. Oliy Majlis Qonunchilik palatasi deputati Mavluda Adhamjonova ishtirokida Andijon tumani markaziy poliklinikasida oʻtkazilgan davra suhbatida ayni shu mavzuda soʻz yuritildi.

Shifokorlar yangi tahrirdagi Konstitutsiyadagi oʻzgarishlar bilan yaqindan tanishganliklarini bildirdi. Jumladan, tibbiyotchilarga qaratilgan eʼtibor,  ularga nisbatan  zoʻravonliklardan qonun bilan himoyalanishlarini qoʻllab-quvvatladilar.

Mavluda Adhamjonova, OMQP deputati:

-Yangilanayotgan  Konstitutsiyamiz chin maʼnoda inson salomatligini himoyalaydi. Unga koʻra  har kim sogʻligʻini saqlash va malakali tibbiy xizmatdan foydalanish huquqiga ega. Davlat sogʻliqni saqlash tizimini, uning davlat va nodavlat shakllarini rivojlantirish choralarini koʻradi. Asosiysi, fuqarolar tibbiy yordamning kafolatlangan hajmini davlat hisobidan olishga haqli.

Davra suhbati 30-aprel kuni boʻlib oʻtadigan referendumda barchaning  ishtiroki va tibbiyot xodimlari jarayonda faollik koʻrsatishiga chaqiriq bilan yakunlandi.

“Adolat” SDP Andijon viloyat kengashi
Matbuot xizmati.