Tug‘ilgan kuningiz muborak bo‘lsin!

         “Adolat” sotsial-demokratik partiyasi Siyosiy Kengashi raisi o‘rinbosari, taniqli adib, publitsist va shoir Abdukamol Rahmonov 1960 yil 5 may kuni Samarqand viloyatida tug‘ilgan.

         1986 yilda Samarqand davlat universitetining huquqshunoslik fakultetini tamomlagan. Mutaxassisligi – huquqshunos. Ikkinchi malaka darajali sudya, birinchi darajali adliya maslahatchisi maxsus unvonlari sohibi.

         Mehnat faoliyati davomida qator davlat idoralari va jamoat tashkilotlarida masʼul lavozimlarda ishlagan. Xususan, “Qizil yarim oy” jamiyati Siyob tumani qo‘mitasi raisi, Pastdarg‘om tumani prokuraturasi tergovchisi, Samarqand viloyati prokuraturasi tergov boshqarmasi prokurori, viloyat prokurorining katta yordamchisi, Narpay tumani sudining raisi, Samarqand viloyati sudi raisining jinoyat ishlari bo‘yicha o‘rinbosari, Fuqarolik ishlari bo‘yicha Samarqand viloyati sudining raisi lavozimlarida faoliyat yuritgan.

         2010-2015 yillarda O‘zbekiston Respublikasi Oliy Majlisi Qonunchilik palatasining deputati etib saylangan.

         A.Rahmonov Xorazm Maʼmun akademiyasining faxriy aʼzosi, O‘zbekiston Yozuvchilar uyushmasi aʼzosi hamda Jurnalislar uyushmasi aʼzosi sifatida 5 ta badiiy, 15 ta ilmiy va publitsistik adabiyot, 600 ga yaqin badiiy va ilmiy-publitsistik maqolalar muallifi. Shuningdek, 20 dan ortiq kitoblar muharriridir.

         A.Rahmonovning “Yetuklikning yetti siri” nomli yana bir asari kitobxonlar qo‘liga yetib bordi. Unda zamonamiz qahramonlarining hayoti va faoliyatidan hikoya qilinadi.

         Uzoq yillik vatanimiz ravnaqi yo‘lidagi fidoiy mehnatlari uchun 2021 yil “Do‘stlik” ordeni, 2022 yil 1-darajali “Mehnat faxriysi” va shu yil  O‘zbekiston Respublikasi Adliya vazirligining “Adliya vazirligiga 30 yil” esdalik nishoni bilan taqdirlandi.

Tavallud ayyomingiz  muborak bulsin! Sizga mustahkam sog‘lik, uzoq umr  va Vatanimiz ravnaqi yo‘lidagi ezgulik, adolat ishlaringizda kuch-quvvat va ulkan zafarlar tilaymiz! Hamisha yaqinlaringiz, shogirdlaringiz ardog‘ida bo‘ling!  Omad xamisha Sizga yor bulsin!