Uvaysiy ziyoratgohi yana obod boʻladi

Аdolat.uz saytida jurnalist Raʼno Xoliqova tomonidan Margʻilonda tugʻilib, ijod qilgan Jahon otin Uvaysiy haqida “Uvaysiyni unutdikmi?” sarlavhasi ostida maqola eʼlon qilingan edi. Unda jurnalistning Margʻilon safari bilan bogʻliq taassurotlari, Uvaysiy ziyoratgohi haqida maʼlumot berilgan.

– Аmmo, ming afsuski, u yerdagi holatdan bir lahza esankirab qoldim: pala-partishliklar, noxush koʻrinish – ziyoratgoh hududidagi toʻplanib qolgan uyum-uyum xazonlar, panjaralarning sinib yotishi, atrofdagi tartibsizliklar, polietilen xaltalar, shoira haykalining loyga chaplangan holatini oʻz koʻzim bilan koʻrar ekanman, nigohlarimda hayrat va alam qotdi. Sherigimga adashib, boshqa joyga kelib qolmadikmi, degandek savolomuz tikildim. Аsli shu yerlik hamrohim koʻzlarini yerga qadab, yoʻq, degandek afsus bilan bosh chayqadi. Yuragim ezildi. Oʻz zamonasining eng ilgʻor namoyondalaridan biri boʻlgan, oʻzbek adabiyotining oʻz nufuziga, qadr-qiymatiga ega klassik shoirasi Jahon otin Uvaysiy xalqimiz maʼnaviyat osmonining yorqin yulduzlaridan biridir. Oʻz davrining buyuk shoirasiga nisbatan vatandoshlari, mahalladoshlarining eʼtibori, hurmati shumi? Koʻksimdagi yurak ozorlanib, sanchib qoʻydi, dilim ogʻridi, – deb yozadi jurnalist.

Holat yuzasidan Xalq deputatlari Fargʻona viloyati Kengashi deputati Sherzod Karimov Margʻilon shahar “Uvaysiy” MFYda joylashgan Jahon otin Uvaysiy ziyoratgohini borib oʻrgandi. Ziyoratgohning mavjud koʻrinishi yuzasidan zarur choralar olib borildi. Jumladan, obodonlashtirish boshqarmasi xodimlari ishtirokida barcha tozalov ishlari bajarildi, shoira haykali artib tozalandi, atrofidagi daraxtlar oqlandi. Chiqindilar olib chiqib tashlandi. Ziyoratgohdagi mavjud nosoz jihozlar sozlandi va tartibga keltirildi.

– Ziyoratgohning eʼtiborsiz tashlab qoʻyilishi albatta, achinarli holat. Аfsuski, koʻplab fuqarolar tomonidan hurmatsizlik bilan munosabatda boʻlinib, axlat toʻla sellofan xaltalar tashlab ketilishini kuzatish mumkin. Qolaversa, oʻz vaqtida tozalov ishlari amalga oshirilmagan. Bu albatta, ziyoratchilarning dilini xufton qilmoqda. Biz zarur choralarni koʻrgan holda, ziyoratgoh obodligini nazoratga olib, bahor mavsumida taʼmirlash ishlarini rejalashtirdik. Ziyoratgohni obod maskanga aylantirish borasida chora-tadbirlarni masʼul tashkilotlar bilan hamkorlikda olib boramiz, – deydi deputat.

“Аdolat” SDP Fargʻona viloyat kengashi 

Matbuot xizmati.