Uzluksiz ta’minot ikki va ko‘p tomonlama hamkorlikni taqozo etadi

Prezidentimiz huzurida shu yil 16 yanvar kuni qish mavsumida aholini energiya resurslari bilan uzluksiz ta’minlash bo‘yicha ko‘rilayotgan choralar yuzasidan kengaytirilgan yig‘ilish bo‘lib o‘tgandi.

Yig‘ilishda davlatimiz rahbari tomonidan elektr va gaz tarmoqlarining uzluksiz ishlashini ta’minlab berish bugungi kunda barcha darajadagi rahbarlarning eng katta vazifasi ekanligi bo‘yicha aniq ko‘rsatmalar berildi.

Bu jarayonda, tabiiyki, eng katta yuklama va mas’uliyat aholini gaz hamda energetika bilan ta’minlashga mas’ul idora bo‘lmish Energetika vazirligi zimmasiga tushadi. O‘zbekiston Energetika vazirligi Rossiyaning “Gazprom” kompaniyasi bilan gaz sanoati sohasida hamkorlik bo‘yicha imzolagan “yo‘l xaritasi” ayrim yurtdoshlarimizning noo‘rin xulosalariga sabab bo‘ldi.

Hatto ikki yirik tuzilma o‘rtasidagi hamkorlikni mamla katning suverenitetga daxl qilish maqsadida tuzilgan hujjat sifatida talqin qilganlar, iqtisodiy kelishuvlarga siyosiy tus bermoqchi bo‘lganlar ham topilgani achinarli holatdir. Yanglish xulosalari bilan jamoatchilikni chalg‘itishga uri nayotganlarning aksariyati aslida haqiqiy holat, vaziyat bilan to‘liq tanish emas.

Aksariyat “ekspertlar” tanqid ostiga olgan “yo‘l xaritasi”ga asosan 2023 yil 1 martdan boshlab Rossiyadan O‘zbekistonga tabiiy gaz importi yo‘lga qo‘yilishi ko‘zda tutilmoqda. Shu jihatdan, ikki yirik tashkilot o‘rtasida tuziladigan kelishuv, hamkorlik yoki bitimlarni bozor iqtisodiyoti sharoitida rivojlanayotgan mamlakatda normal holat sifatida qabul qilish kerak.

Qayd etish joizki, O‘zbekiston nafaqat gazni import qilayotgan, balki o‘z gaz transport tizimiga sarmoya kiritayotgan, bu boradagi loyihalarni amalga oshirib kelayotgan mamlakat hisoblanadi. Birgina o‘tgan 2022 yilda mamlakatimizda respublika bo‘yicha 54,9 kilometr magistral gaz quvurlari va 17 ta gaz taqsimlash stansiyasi rekonstruksiya qilindi, 2 200 km magistral quvurlar texnik diagnostikadan o‘tkazildi. Shuningdek, 50,7 km gaz tarmoqlari mukammal va joriy ta’mirlanib, rekonstruksiya qilindi, 299 ta gaz taqsimlash punkti rekonstruksiya qilinib, 69,8 mingtasi texnik taftishdan o‘tkazildi.

Muxtasar aytganda, aholining kundalik hayot tarzi, iqtiso diyotning qator ishlab chiqarish va xizmat ko‘rsatish tarmoqlarining uzluksiz faoliyati uchun yetadigan gaz va elektrni topish maqsadida barcha mavjud imkoniyat hamda salohiyatni ishga so lish eng maqbul yo‘ldir.

Dilshod HAMZAYEV,

Oliy Majlis Qonunchilik palatasi deputati