Vazifalar belgilab olindi

Oʻzbekiston “Аdolat” SDP Siyosiy Kengashi Ijroiya Qoʻmitasining 2022 yildagi faoliyati yuzasidan hisoboti va 2022-2026 yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturidan kelib chiqadigan 2023 yildagi ustuvor vazifalari toʻgʻrisida yigʻilish boʻlib oʻtdi. Unda Fargʻona viloyati Kengashi xodimlari “Zoom” platformasi orqali ishtirok etdi.

Partiya siyosiy Kengashining 2022 yil faoliyati tahlil etilib, partiyaning dasturiy vazifalarini amalga oshirishga qaratilgan loyihalar, partiya elektorati va aholining keng qatlami bilan yuzma-yuz muloqotlar, ularni qiynayotgan, jamiyat rivojiga toʻsiq boʻlayotgan muammolarni bartaraf etish, saylovchilar bilan tizimli ishlash va partiya nufuzini oshirishga qaratilgan koʻplab masalalarda fikr yuritildi.

Xususan, xalq bilan yuzma-yuz muloqot oʻrnatish maqsadida partiyaning “Muammo bilan yuzma-yuz” loyihasi doirasida barcha darajadagi deputatlik korpuslari ishtirokida joylarga qonunlarning yetib borishi va ularning ijrosini oʻrganish, mavjud muammolarni bartaraf etish choralarini koʻrish boʻyicha tegishli davlat organlariga takliflar kiritish orqali qonun ustuvorligini taʼminlashga qaratilgan amaliy ishlar belgilandi. Bu oʻrinda shahar-tuman Kengashlari deputatlarining saylovchilar bilan uchrashuvlari, mamlakatimizda olib borilayotgan islohotlar, qonunchilik tizimidagi oʻzgarishlar boʻyicha davra suhbatlarning ahamiyati katta ekanligi taʼkidlandi.

Viloyat Kengashlari faoliyatini yanada jonlantirish, ayollar, yoshlar safini kengaytirish, partiya maqsad va vazifalarini amalga oshirishga qaratilgan targʻibot tadbirlarini sifat va son jihatdan oshirish boʻyicha takliflar bildirildi. Fargʻona viloyat Kengashi jamoasi tomonidan ham bildirilgan fikrlar yuzasidan xulosa qilinib, faoliyati yuzasidan qoʻshimcha vazifalar belgilab olindi.

 “Аdolat” SDP Fargʼona viloyat Kengashi Matbuot xizmati.