Xudoyzodda 20 ta koʻcha asfalt qilinadi

Xalq deputatlari Qashqadaryo viloyat Kengashi deputati, Oʻzbekiston Qahramoni Muhabbat Sharopovaning Qarshi shahridagi saylovchilari bilan uchrashuvlari samarali kechdi.

Deputat “Zogʻza” MFYdagi oʻnlab xonadonlarda boʻlib, aholi bilan yuzma-yuz muloqot qildi. Birinchi guruh nogironi Muzayyam Qiyomova toʻshakda yotib qolgan. U deputatdan moddiy yordam olishda amaliy yordam berishini soʻrab iltimos qildi. Uning murojaatiga asosan deputat shahardagi mutasaddi idoralarga deputatlik soʻrovi yubordi.

Shu mahallaning “Zogʻza” koʻchasi 46-uyda yashovchi Muharram Abdiyevaning ikki nafar nogiron farzandi bor. Uning hovlisida ikkita oila, jami 9 nafar kishi istiqomat qiladi. Eng achinarli tomoni shundaki, Muharram Abdiyevaning yolgʻiz sogʻlom oʻgʻli Dilmurod Boboyev yaqinda avtohalokatga uchrab yotib qolgan. Ular yashaydigan uy nurab qolgan. Shahardagi masʼul mutaxassislar uyni yashashga yaroqsiz holga kelib qolgan, degan xulosa berishgan. Turar joyini qayta qurish uchun esa Muharram Abdiyevaning moddiy taʼminoti yetarli emas. Fuqaro murojaati boʻyicha bu muammoni obdon oʻrgangan deputat Muhabbat Sharopova ehtiyojmand oilaga haqiqatdan ham yordam koʻrsatish zarur degan xulosaga keldi. Shu tufayli ayni paytda viloyat hokimi nomiga deputatlik soʻrovi chiqarildi.

“Xudoyzod” MFYda aholi bilan yuzma-yuz muloqotga kirishgan deputat bir qator muammolarni oʻz joyida bartaraf etdi. MFY raisi Aʼzam Karimovning murojaati esa oʻrganishni taqozo etdi. Mahalla ichki yoʻllarini oʻrgangan deputat haqiqatdan ham 20 ta koʻchani asfalt qilishga ehtiyoj borligini aniqladi. Bu jumboq Qarshi shahar hokimligi bilan kelishilgan holda 100 foiz bartaraf etiladigan boʻldi.

Nodir Isomov,
partiya faoli.