Yangi hayot uchun, yangi Oʻzbekiston uchun...

“Adolat” SDP Fargʻona viloyati Kengashi tomonidan mamlakatimiz mustaqilligining 32 yilligini munosib kutib olish maqsadida “Yangi hayot uchun, Yangi Oʻzbekiston uchun!” degan bosh gʻoyani oʻzida mujassam etgan maʼnaviy maʼrifiy tadbirlar bilan bir qatorda koʻrik tanlovlarga ham start berdi.

Korxona-tashkilotlarda, mahallalar va taʼlim maskanlarida yangilangan Konstitutsiyamiz mazmun-mohiyati va “Oʻzbekiston – 2030” strategiyasining asosiy ustuvor yoʻnalishlari doirasida belgilangan tub islohotlar haqida xalqimiz vakillari bilan maʼnaviy maʼrifiy suhbatlar tashkil etilmoqda. Istiqlolning xalqimiz uchun bergan cheksiz neʼmatlari har bir vatandoshimiz qalbidan joy olishi uchun targʻibot- tashviqot tadbirlari olib borilyapti.

Partiyaning “Vatan kelajagi yoshlar qoʻlida!” loyihasi doirasida iqtidorli va havaskor yosh rassomlar oʻrtasida10-avgustdan 18-avgustga qadar oʻtkazilayotgan “Oʻzbekiston manzaralari” mavzusida onlayn rasmlar tanlovi yuzlab fargʻonalik yoshlar tomonidan ko’tarinki ruhda kutib olindi, — deydi partiyaning viloyat Kengashi raisi oʻrinbosari Bunyod Ahmadaliyev. — Kelgusi haftada esa “Adolat” SDP tuman va shahar Kengashi raislari, “Yosh adolatchilar” qanoti, Oliy Majlis Qonunchilik palatasidagi huzuridagi Yoshlar parlamentiga Fargʻona viloyatidan saylangan aʼzolari ishtirokida   partiyaning “Tozalik yoʻlida birlashaylik!” loyihasi doirasida “Eng obod mahalla” nomli fotosuratlar tanlovi oʻtkaziladi.

Avgust oyi davomida “Har bir ayol partiya eʼtiborida” loyihasi, “Yangi hayot uchun, Yangi Oʻzbekiston uchun!” degan gʻoya asosida yoshlar oʻrtasida sport musobaqalarini oʻtkazish, “Oʻzbekiston boʻylab sayohat qil!” shiori ostida “Yosh adolatchilar” qanoti aʼzolari ishtirokida yurtimizdagi tarixiy obidalar, ziyoratgohlar va tabiat qoʻyniga sayohatlar uyushtirish ham rejalashtirilgan.

Maqsadimiz xalqimiz bayramni hush kayfiyatda qarshi olishlariga yaqindan koʻmak berishga qaratilgan.

     “Adolat” SDP

Farg’ona viloyat kengashi Matbuot xizmati.