Yangilanayotgan Konstitutsiya aholi manfaatlariga xizmat qiladi

I.M.Gubkin nomidagi Rossiya davlat neft va gaz universitetining Toshkent shahridagi filiali akademik litseyida yangilanayotgan Konstitutsiyaning insonlar hayotida tutgan o‘rni, unga kiritilayotgan yangi normalar va ularning ahamiyatiga bag‘ishlangan tadbir o‘tkazildi.

Mahalla faollari, jamoatchilik vakillari ishtirok etgan tadbirda Oliy Majlis Qonunchilik palatasi deputati Oydin Abdullayeva yangilanayotgan Bosh qomusimiz haqida batafsil ma’lumotlar berdi.

Ta’kidlanganidek, Konstitutsiya – davlatning Asosiy qonuni bo‘lib, shaxs, jamiyat va davlatning o‘zaro munosabatlarini tartibga soladi. Har qanday me’yoriy-huquqiy hujjat qonun, farmon, qaror yoki boshqa bo‘ladimi avvalambor Konstitutsiyaga asoslanadi.

Yangilanayotgan Konstitutsiyada davlat fuqarolarning bandligini ta’minlash, ularni ishsizlikdan himoya qilish, shuningdek, kambag‘allikni qisqartirish choralarini ko‘rishi mustahkamlanmoqda. Qolaversa, davlat fuqarolarning kasbiy tayyorgarligini va qayta tayyorlanishini tashkil etishi hamda rag‘batlantirishi belgilanmoqda.

— Ushbu kiritilayotgan yangi norma ish bilan ta’minlanmagan fuqarolarni kambag‘allik holatiga tushib qolishining oldi olishga yoki kambag‘allik toifasiga kirib qolgan fuqarolarni undan chiqarish bo‘yicha davlat tomonidan tegishli choralar ko‘rilishiga konstitutsiyaviy kafolat sifatida xizmat qiladi, — deydi O.Abdullayeva.

Yana bir muhim norma – agar shaxsning o‘z aybini tan olganligi unga qarshi yagona dalil bo‘lsa, u aybdor deb topilishi yoki jazoga tortilishi mumkin emasligi kafolatlanmoqda. Bu hol jinoyat bo‘yicha haqiqatni aniqlash, shuningdek, aybsiz insonlarning javobgarlikka tortilishini oldini olishga, ayni paytda, jinoyat sodir etgan haqiqiy aybdor shaxs yoki shaxslarni aniqlashga xizmat qiladi.

Tadbir ishtirokchilari kiritilayotgan yangi normalarni e’tirof etib, bergan savollariga atroflicha javoblar olishdi.