“Yangilanayotgan Konstitutsiyada yoshlar huquq va manfaatlari” - “Yoshlar parlamenti” a’zolarining ustuvor vazifalari belgilab olindi

Avvalroq xabar berganimizdek, Oliy Majlis Qonunchilik palatasining Yoshlar masalalari boʻyicha komissiyasining tegishli qaroriga muvofiq “Adolat” sotsial-demokratik partiyasidan ilgari surilgan 24 nafar faol yoshlar Yoshlar parlamentiga saylangan edi.

Kuni kecha partiya Markaziy apparati majlislar zalida tashkil qilingan “Yangilanayotgan Konstitutsiyada yoshlar huquq va manfaatlari” mavzusidagi davra suhbati doirasida partiya Siyosiy Kengashi rahbariyati va Markaziy apparat xodimlari bilan partiyadan Yoshlar parlamentining yangi tarkibiga saylangan faol yoshlar ishtirokida ochiq muloqot tashkil qilindi.

Tadbirda partiya Siyosiy Kengashi raisi Bahrom Abduhalimov saylov bosqichlaridan muvaffaqiyatli oʻtib Yoshlar parlamenti aʼzosi boʻlishdek yuksak ishonchga sazovor boʻlgan yoshlarga samimiy tabrik yoʻllash barobarida ularning oldida turgan eng muhim vazifalar, xususan, bugungi kundagi muhim siyosiy jarayon — Oʻzbekiston Respublikasi Referendumi oldidan joylarda tashkil etilayotgan targʻibot-tashviqot tadbirlarida yangilanayotgan Konstitutsiya mazmun-mohiyatini aholiga ayniqsa, yoshlar oʻrtasida keng targʻib qilish shuningdek, Yoshlar parlamenti faoliyatida yoshlarning manfaati, haq-huquqlari va kamolotiga daxldor yangi tashabbuslar va takliflarni yuzaga chiqarish, joylarda yoshlarning muammo hamda takliflarini oʻrgangan holda qonunchilikka yangi takliflarni kiritish borasidagi fikr va tavsiyalarini berib oʻtdi.

Shuningdek, partiya rahbariyati, faollar, ekspertlar hamda partiyaning “Yosh adolatchilar” qanoti aʼzolari ishtirokida tizimli ravishda siyosiy-oʻquv tadbirlarini muntazam tashkil etib, Yoshlar parlamenti aʼzolarining bilim va malakalarini doimiy oshirib borish, aʼzolar faoliyatini muvofiqlashtirish borasidagi vazifalar belgilab olindi.

Gibrid tarzda (bir vaqtning oʻzida ham oflayn, ham ZOOM platformasi orqali onlayn tarzda) tashkil etilgan tadbir davomida respublikamizning turli hududlardan saylangan Yoshlar parlamenti aʼzolari oʻzlarining yoshlar masalalariga oid qator tashabbus, taklif va fikr-mulohazalarini bildirib oʻtishdi.

Ochiq, konstruktiv ruhda oʻtgan muloqot yakunida tadbir ishtirokchilari Yoshlar parlamentining yangi aʼzolariga kelgusi faoliyatlarida ulkan zafarlar tiladilar hamda ularga yoshlarga oid qonun ijodkorligi, jamoatchilik nazorati hamda yoshlarimizning huquqiy va siyosiy savodxonlikni yanada yuksaltirish, shuningdek, partiya saylovoldi Dasturida ilgari surilgan maqsad va vazifalarni hayotga tatbiq etishda katta hissa qoʻshishlariga ishonch bildirilib, partiyaning Ishonch yorliqlari topshirildi.

“Adolat” SDP
Matbuot xizmati.