Yoshlar – kelajagimiz bunyodkorlari!

Soʻnggi yillarda mamlakatimizda navqiron avlod vakillarini har tomonlama yetuk, Yangi Oʻzbekistonda amalga oshirilayotgan ulkan islohotlarda faol qatnashuvchi komil shaxslar sifatida tarbiyalashga, iqtidori, salohiyatini toʻla roʻyobga chiqarishga qaratilgan tizimli ishlar amalga oshirilmoqda. Isteʼdodli yoshlarimiz keyingi yillarda xalqaro fan olimpiadalarida, sportchi yoshlarimiz xalqaro musobaqalarda sovrinli oʻrinlarni egallagani ham ana shu oqilona siyosat mahsulidir.

Oʻz navbatida, mamlakatimizda amalga oshirilayotgan ijobiy islohotlar, jumladan, yoshlarni har tomonlama qoʻllab-quvvatlashga qaratilgan chora-tadbirlar, vazifalar partiyamiz zimmasiga ham katta masʼuliyat yuklaydi. Shundan kelib chiqib, Oʻzbekiston “Adolat” sotsial-demokratik partiyasi 2022-yil faoliyati “2022-2026-yillarga moʻljallangan Yangi Oʻzbekistonning taraqqiyot strategiyasi toʻgʻrisida”gi Prezident Farmoni, “Inson qadrini ulugʻlash va faol mahalla yili”da amalga oshirishga oid Davlat dasturi, Davlatimiz rahbarining 2021-yil 2-fevralda siyosiy partiyalar vakillari bilan boʻlib oʻtgan uchrashuvida belgilangan ustuvor vazifalar, partiyaning “Taraqqiyot strategiyasi”dan kelib chiqadigan 2022-yilga moʻljallangan chora-tadbirlar rejasi hamda “Adolat – har bir inson uchun” saylovoldi Dasturida belgilangan ustuvor vazifalar ijrosiga yoʻnaltirdi.

Yil davomida partiyaning hududiy va mahalliy Kengashlari tomonidan yoshlarning ijtimoiy-siyosiy faolligini oshirish yoʻnalishida salmoqli ishlar amalga oshirilib, ayni davrda partiya aʼzolari sonining 38 % ni yoshlar tashkil etayotganligi quvonarli holat, albatta.

Partiyamiz tomonidan, yoshlarga doir davlat siyosatini aholi orasida keng targʻib qilish, ayniqsa, yoshlarning davlat va jamiyat ishlarida ishtirokini, faolligini kuchaytirish, ularning siyosiy, huquqiy, tibbiy, ekologik madaniyatini yuksaltirishga hissa qoʻshish, partiya dasturiy maqsad va vazifalarini yoshlar orasida keng targʻib qilish maqsadida 10 ga yaqin loyihalar amalga oshirib kelinmoqda.

Shuningdek, “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasining muhokamalarida ham partiyaning “Yosh adolatchilar” qanoti aʼzolari ishtirokida “Konstitutsiyaviy islohotlarda yoshlarning oʻrni” mavzusida 300 dan ortiq davra suhbatlari tashkil etilgan. Konstitutsiyaviy islohotlar jarayonida yoshlarning faolligini, ularning siyosiy savodxonligi oshirish boʻyicha koʻplab tadbirlar, uchrashuvlar tashkil etilgan va bu orqali yoshlardan koʻplab asosli takliflar kelib tushgan.

Uchinchi Renessansning 4 uzviy halqasi, maktabgacha taʼlim, umumiy taʼlim, oliy taʼlim va ilmiy texnikaviy jarayonlarni rivojlantirish, ularga sharoit yaratish boʻyicha yangi normalarning kiritilayotgani yoshlarni barkamol va intellektual salohiyatli inson qilib tarbiyalashga qaratilayotgan eʼtibor deya, baholash mumkin. Taʼkidlash joizki, partiya tizimidagi tashabbuskor yoshlar ham mazkur jarayonlarda oʻz takliflari bilan faol boʻlganligi tahsinga sazovor. Xususan, partiyamiz yoshlar tomonidan mingga yaqin takliflar ilgari surildi. Ayniqsa, faol va tashabbuskor yoshlarimiz tomonidan konstitutsiyada aholiga tibbiy va ijtimoiy xizmatlarning aks etishi, inson qadrini ulugʻlash, inson huquqlari kafolatini mustahkamlash boʻyicha takliflar berilgan.

Shuningdek, yoshlar bandligini taʼminlash va boʻsh vaqtlarini mazmunli tashkil etish, mahallardagi uyushmagan yoshlar bilan ishlash, ularni turli xil yot gʻoyalar taʼsiriga tushib qolishdan asrash, taʼlim olishga va kasb-xunar oʻrganishga jalb etish maqsadida partiya tomonidan ishlab chiqilgan “Bir oyda – bir ish oʻrni” loyihasi doirasida jami 1208 nafar yoshlar ish bilan taʼminlangan.

Shu bilan birga, partiyaning hududiy Kengashlari qoshida iqtidorli yoshlarni qamragan “Isteʼdod klubi” faoliyat olib bormoqda. 2022-yil yakuni boʻyicha jami klub aʼzolari soni 3154 nafarga yetganligi, ular bilan har oyda bir marotaba jami 347 marotaba uchrashuvlar, ijodiy bahs-munozaralar, ijodiy mahorat darslari tashkil etilgan.

Muxtasar aytganda, Oʻzbekistonda yoshlarga oid davlat siyosati aniq maqsadlarni koʻzlagan holda, bosqichma bosqich, kompleks chora-tadbirlarga asoslangan holda izchil davom ettirilmoqda. Bu borada Oʻzbekiston “Adolat” sotsial-demokratik partiyasining saylovoldi Dasturida aholisining yarmidan koʻprogʻi yoshlardan iborat boʻlgan mamlakatda yoshlarga oid davlat siyosatini izchil amalga oshirish, intellektual salohiyatli, oʻz qatʼiy pozitsiyasiga ega, yurtda amalga oshirilayotgan islohotlarga befarq boʻlmagan komil shaxslar sifatida tarbiyalashda bir qator vazifalar belgilab oʻtilgan.

Quatbay Mirzabayev,
Oʻzbekiston “Adolat” SDP
Markaziy apparati yetakchi mutaxassisi