Yoshlar muammolariga davlat siyosati darajasida yechim topiladi

Bugungi kunda mamlakatimizda olib borilayotgan keng koʻlamli islohotlar zamirida, albatta, xalqimizning farovonligini oshirish, mamlakatimizni rivojlangan davlatlar qatoridan munosib oʻrin egallashiga qaratilgan ustuvor maqsadlar yotadi.

Xabaringiz bor, joriy yilning 11-aprel kuni Prezident Shavkat Mirziyoyev raisligida yoshlar siyosati sohasidagi ishlar natijadorligini oshirish chora-tadbirlari yuzasidan videoselektor yigʻilishi boʻlib oʻtdi. Yigʻilishda yoshlarni manzilli qoʻllab-quvvatlash va ularga yaratilgan imkoniyatlar hamda yoshlar bandligini taʼminlash uchun, avvalo, ishga qabul qilish tizimini qayta koʻrib chiqish zaruriyati Davlatimiz rahbari tomonidan taʼkidlandi.

Haqiqatdan ham mamlakat aholisining katta qismini zamonaviy bilim va koʻnikmalarga ega yoshlar tashkil etadi. Mazkur qatlamning ijtimoiy-iqtisodiy va boshqa sohalardagi manfaatlarini himoya qilish va kuzatilayotgan dolzarb masalalarning nazariy va amaliy jihatdan yechimini topish kun tartibidagi muhim vazifaga aylanib bormoqda.

Oʻtgan davr mobaynida, bu borada qator chora-tadbirlar va meʼyoriy-huquqiy hujjatlar ishlab chiqildi hamda yoshlarning intilish va iqtidorlarini qoʻllab-quvvatlash, ragʻbatlantirishga oid mustahkam tizim yaratildi.

Prezidentimiz tomonidan yana bir muhim qadam, yoshlar taʼlim-tarbiyasi uchun qoʻshimcha sharoitlar yaratish, xotin-qizlar bandligini oshirishga qaratilgan kompleks chora-tadbirlarni oʻz ichiga olgan 5 ta tashabbusni amaliyotga joriy etilishidir.

Shu bois, yoshlarga sifatli taʼlim berish, kasb-hunarga oʻqitish va bandligini taʼminlashga alohida eʼtibor qaratilmoqda. Bu ishlarni mahallada tashkil etish boʻyicha ayni davrda vertikal boshqaruv tizimi yaratildi. Xususan, 9 ming 500 ta mahallaga fidoyi va tashabbuskor yoshlar yetakchilari tayinlangan. Bu tizim orqali yoshlarga 100 dan ortiq imkoniyatlar yaratildi, ularni manzilli qoʻllab-quvvatlash yoʻlga qoʻyildi.

Ijtimoiy qoʻllab-quvvatlash boʻyicha ham koʻp ishlar qilinmoqda. Jumladan, 2022-yili 130 ming talabaga taʼlim krediti berildi, xotin-qizlarning magistraturada bepul oʻqishi taʼminlandi.

Qayd etish joizki, bugun Oʻzbekistonda yoshlarning hayotiy maqsadlarini hayotga tatbiq etishlari uchun zarur boʻlgan barcha sharoitlar yaratilmoqda. Yoshlar muammolari davlat siyosati darajasida hal etilmoqda.

Ammo, yigʻilishda muhtaram Prezidentimiz Sh.Mirziyoyev tomonidan bu borada dolzarb masalalar hali ham koʻpligi, yurtimizda 722 ming nafar rasman ishsiz yoshlar borligi qayd etib oʻtildi.

Barcha yoshlarning ijtimoiy ahvoli, qobiliyati va qiziqishlari oʻrganilib, “mahalladan vazirlikkacha” tizimida ishlash choralari belgilab olinganligi taʼkidlandi.

Shuningdek, yigʻilishda, yoshlarning hayotda oʻz oʻrnini topishi uchun munosib sharoit yaratish, ularni har tomonlama qoʻllab-quvvatlash, kasbga yoʻnaltirish va bandligini taʼminlashda avvalo, ishsiz, norasmiy sektorda band boʻlgan va chet elga ishlagani ketgan yoshlar masalasiga alohida eʼtibor qaratildi. Bu borada ishga qabul qilish tizimini qayta koʻrib chiqish kerakligi taʼkidlandi.

Aksariyat yoshlarning xorijiy davlatlarga ishlash uchun chiqib ketish holatlari kasb-hunarga ega boʻlgan mutaxassislarning koʻproq boshqa davlatlar iqtisodiyotini rivojlantirishiga xizmat qilmoqda. Bu oʻz navbatida yoshlarni ish bilan taʼminlash, hayotiy ehtiyojlaridan kelib chiqqan holda oylik maosh belgilashga qaratilgan va tadbirkorlikka jalb qilish bilan bogʻliq hududiy dasturlar sifatini yanada oshirish lozimligini anglatadi. Xorijiy mamlakatlar xususan, Janubiy Koreyada 2013-yildan yirik kompaniya va biznesmenlar yosh tadbirkorlarni moliyalashtirish, ularning iqtisodiy barqarorlikka erishishiga koʻmaklashadigan boʻlsa huquqiy hujjatlarda aks etgan maʼlum bir muddatlarda soliqlardan ozod etilishi belgilab qoʻyilgan.

Yigʻilishda yoshlar manfaatlariga xizmat qiladigan “Yangi Oʻzbekiston yoshlari tashabbuslari” jamgʻarmasi va elektron platformasi tashkil qilinishi belgilanib, ushbu jamgʻarmaga 100 million dollar yoʻnaltirilishi bu mablagʻlar iqtidorli yoshlarning eng yaxshi gʻoya, startap va loyihalariga yoʻnaltirilishi taʼkidlandi.

Shu bilan birga, prezident yoshlarning boʻsh vaqtlarini mazmunli tashkil etish masalalariga ham toʻxtalib, bugungi kunda 1,5 million yoshlar boʻsh vaqtini chet tili oʻrganishga bagʻishlayotgani, ularning bu intilishlarini ragʻbatlantirish maqsadida xususiy markazlarda til oʻrganish xarajatlariga subsidiyalar ajratish ham eʼtibor markazida ekanligini taʼkidlab oʻtdi.

Oʻtkazilgan videoselektor yigʻilishida yoshlarni har tomonlama qoʻllab-quvvatlash maqsadida keltirib oʻtilgan muhim vazifalar yuzasidan barcha mutasaddilarga aniq vazifalar yuklatildi.

Gulniso SAIDOVA,
Oʻzbekiston “Adolat” SDP
Siyosiy Kengashi Markaziy apparati
boshqarma boshligʻi