Yoshlar parlamenti saylovi yuzasidan targʻibot tadbirlari qizgʻin pallada

Bugungi kun yoshlari dunyo miqyosida oʻz erkinliklari, qonuniy haq-huquqlari va manfaatlariga oid dolzarb muammolarni hal qilish va ularga taʼsir koʻrsatishda demokratik va fuqarolik jamiyatini shakllantirish jarayonining haqiqiy ishtirokchisiga aylanmoqda.

Respublikamizda yoshlarning huquq va manfaatlarini himoya qilish, ularga zarur shart-sharoitlar va imkoniyatlar yaratish borasida mustahkam huquqiy baza yaratilgan va bu tizim zamon talablariga hamohang ravishda takomillashtirib borilmoqda. Bu esa yosh avlodga, ularning manfaatlariga taʼsir koʻrsatadigan muhim iqtisodiy va ijtimoiy-siyosiy muammolarni hal qilish jarayonida ishtirok etish uchun kerakli imkoniyat va muhitni yaratib beradi.

Yoshlar parlamenti yoshlarning manfaatlarini himoya qilish, ularning muammolarini parlament minbariga olib chiqish, qonun ijodkorligida yoshlarning ishtirokini taʼminlash, boʻlgʻusi deputatlar, Senat aʼzolari hamda siyosatchilarni tayyorlash, yoshlarni ulkan maqsad va aniq loyihalarga yoʻnaltirib borish kabi vazifalarni bajaradi.

Kuni kecha, 31- yanvar kuni “Adolat” SDP Markaziy apparati tomonidan, yoshlarni saylov oldi qoʻllab quvvatlash ularning qiziqtirayotgan savollariga javob berish maqsadida ONLINE tarzda videokonferensiya yigʻilishi tashkil etildi. Ushbu uchrashuvda Yoshlar parlamentiga oʻz nomzodlarini qoʻygan yoshlar, partiyaning hududlardagi vakillari hamda partiya faollari ishtirok etishdi. Uchrashuv davomida nomzodlar oʻzlarini qiziqtirgan barcha savollarga toʻliq javob olishdi. Yoshlarni saylov Nizomida keltirilgan har bir band bilan yanada chuqurroq tanishtirgan Markaziy kengash vakillariga faol yoshlarimiz oʻz minnatdorchiliklarini bildirishdi.

Аyni paytda bu boradagi ishlar partiyaning Samarqand viloyat kengashida ham juda qizgʻin tarzda ketmoqda. Xususan, Samarqand veterinariya va meditsinasi universitetida ham aynan yoshlar bilan Yoshlar parlamentiga boʻlib oʻtadigan saylovlar yuzasidan targʻibot uchrashuvi tashkil etildi. Tadbir davomida belgilangan Nizom asosida saylovning borishi, nomzodlarga qoʻyilayotgan talablar xususida soʻz yuritildi. Yoshlarni qiziqtirgan savollarga batafsil javoblar berildi.

Ruslan Ochilov,
“Adolat” SDP Samarqand viloyat kengashi mutaxassisi.