Yot urf-odatlari bizni qayerga yetaklamoqda?

Bugungi kunda yoshlarimiz orasida keng tarqalgan, lekin na qolipga va na oʻzbekchiligimizga toʻgʻri kelmaydigan koʻplab yangiliklar urfga kirib ketdi. Shular jumlasidan hali toʻyi boʻlib ulgurmagan ikki yoshning toʻyxonada katta ekranda toʻydan oldin uchrashgan lavhalari aks ettirilgan videolar va fotosuratlarning namoyish etilishi. Aynan mana shunday (LOVE STORY) deb chet el odatlarini targʻib qiluvchi yangiliklarni bugun koʻplab toʻy marosimlarida kuzatyapmiz.

Mana kuni kecha ijtimoiy tarmoqlarda tarqalgan videoda ikki yigit va bir qiz muz ostidan tortib olinayotganini koʻrish mumkin. Ularga yordam bermoqchi boʻlganlar ham suvga tushib ketishgan.Eʼtiborlisi, ushbu holatda ham aynan mana shunday toʻy arafasidagi kelin va kuyovning videolavha olish maqsadida ushbu muzlagan koʻl ustiga chiqishganidir. Samarqand iqtisodiyot va servis instituti roʻparasida joylashgan xiyobonda paydo boʻlgan muzli “koʻl” yorilib ketib, uning ustida boʻlgan yoshlar muzday suvga tushib ketdi. Deyarli, har kuni Favqulodda vaziyatlar vazirligi aholiga koʻp marotaba ommaviy axborot va ijtimoiy tarmoqlar orqali koʻllar ustidagi muzlarda uchmaslikni tavsiya etib taʼkidlab kelishayotgan bir vaqtda, oʻz salomatligiga eʼtiborsizlik qilayotgan va bir lahzalik zavq uchun oʻz hayotini xavf ostiga qoʻyayotgan yoshlarimiz ham uchrab turibdi.

Mana shunday gʻarb odatlarini targʻib qilayotgan yot urf-odatlardan voz kechsakkina, kelgusida tinch va farovon jamiyatimizning sogʻlom avlodini voyaga yetkazishimiz mumkin deb hisoblayman.

Sanobar Mirsaidova,
Xalq deputatlari Samarqand viloyat kengashi deputati.