Zahiriddin Muhammad Bobur tavalludi munosabati bilan maʼnaviy-maʼrifiy tadbir boʻlib oʻtdi

14-fevral - Zahiriddin Muhammad Bobur tavalludining 540-yilligi munosabati bilan Oʻzbekiston “Adolat” SDP Siyosiy Kengashi Markaziy apparatida maʼnaviy-maʼrifiy tadbir oʻtkazildi.

Uni partiya Siyosiy Kengashi raisi Bahrom Abduhalimov kirish soʻzi bilan ochdi.

Taʼkidlanganidek, Zahiriddin Muhammad Bobur betakror shoir, zakovatli olim va tarjimon, donishmand tarixchi, yirik davlat va madaniyat arbobi, mohir sarkarda sifatida oʻzining 47 yillik hayoti davomida asrlar osha dunyoni hayratga solib kelayotgan buyuk shaxsiyatni namoyon qildi.

Adib ijodining sarchashmasi hisoblangan memuar asar “Boburnoma”, nafaqat milliy adabiyotimizning noyob durdonalaridan, shuningdek, jahon adabiyotining nodir namunalaridan biri sanaladi.

“Boburnoma”ning ahamiyatli jihatlaridan yana biri, u oʻz davrida adabiyotimizda nasr janrida yaratilgan yirik asarlardan biri sifatida ham muhim oʻrin tutadi. Ushbu qomusiy asar bugungacha 30 dan ortiq tilga tarjima qilingan. Qolaversa, Bobur va boburiylar sulolasiga oid koʻplab bebaho manbalar bugun jahonning 70 dan ortiq muzeylarida saqlanyapti.

Tadbir davomida so'z olgan partiya Markaziy apparati xodimlari Zahiriddin Muhammad Bobur ruboiylari va gʻazallariga murojaat qilishib, buyuk bobokalonimiz shaxsiyati bilan bogʻliq qator maʼlumotlarni tilga oldilar. Shuningdek, jarayonda buyuk shoh va shoirning boy adabiy hamda hayotiy merosi yosh avlodni vatanparvarlik ruhida, har jihatdan barkamol qilib tarbiyalashda muhim ahamiyat kasb etishi eʼtirof etildi. 

Tadbir barchada katta taassurot uygʻotdi.

“Adolat” SDP
Matbuot xizmati.