Bor mehrimiz senga, bolajon!

Tibbiyotda bemorga yordam koʻrsatishda ayrim holatlar borki, unda insonning hayotini asrab qolish koʻpincha qon quyish jarayoni bilan bogʻliq. Qon esa kimyo laboratoriyalarida ishlab chiqilmaydi, u inson organizmidagi bebaho neʼmat. Faqat yaxshi insonlarning yordami bilangina ogʻir ahvoldagi bemorlarni hayotga qaytarish, ularning umriga umr qoʻshish mumkin. Ayniqsa, gap bolalar salomatligini saqlab qolish haqida ketganda ushbu amaliyot yanada muhim ahamiyat kasb etadi.

Maʼlumki, “Adolat” sotsial-demokratik partiyasi tomonidan mamlakatimizda begʻaraz donorlik harakatini rivojlantirish, aholining keng qatlamlarini ushbu xayrli ishga jalb etish, bemorlarni, ayniqsa, turli xastalikka chalingan bolalarni xavfsiz qon komponentlari bilan taʼminlash masalalariga katta eʼtibor qaratib kelinadi.

Mana bir necha yildirki, partiya tomonidan mazkur xayrli tadbir anʼanaviy tarzda tashkil etib kelinmoqda. Xar yili partiyaning Markaziy va hududiy kengashlari xodimlari, deputatlar, ayol-qizlar va yoshlardan iborat partiya faollari Respublika qon qoʻyish markazining mutaxassislari koʻmagi bilan mamlakatimiz hududlari boʻylab “Bor mehrimiz senga, bolajon!” shiori ostida keng koʻlamda oʻtkaziladigan begʻaraz donorlik aksiyasida faol ishtirok etadilar.

Bu safargi aksiya ham 1-iyun — Xalqaro bolalar kuni munosabati bilan bayram sanasida Respublika qon qoʻyish markazida hamda uning Respublikadagi hududiy boʻlimlarida soat 9:00 dan – 16:00 gacha belgilangan jadvali asosida oʻtkazildi.

Jamiyatda sogʻlom turmush tarzi va insonparvarlik gʻoyalarini targʻib qilish, muhtojlarga koʻmak berish, bemor bolajonlar hayotini saqlab qolish maqsadida oʻtkazilgan tadbirda partiyaning Oliy Majlis Qonunchilik palatasidagi hamda mahalliy Kengashlardagi deputatlari, Yoshlar parlamenti aʼzolari, “Adolat” SDP Ayollar qanoti va “Yosh adolatchilar qanoti” faollari, partiya tizimida faoliyat olib borayotgan xodimlar, koʻngilli yoshlar hamda OAVlar vakillari faol ishtirok etishdi.

Tadbir avvalida shifokorlar tomonidan aksiyada koʻngilli tarzda ishtirok etayotganlarga qon topshirishning foydali xususiyatlari, tartibi va talablari, uning turli kasalliklarning oldini olishdagi ahamiyati haqida tushunchalar berildi.

Uyushqoqlik bilan oʻtkazilgan aksiyaga ayniqsa, partiya xodimlari va aʼzolari katta hissa qoʻshishdi.

Mazkur aksiya chogʻida topshirilgan qon gematologlik kasallikka chalingan bolajonlar salomatligini tiklashga xizmatga qilishi Respublika qon qoʻyish markazi mutaxassislari tomonidan alohida eʼtirof etildi.

Taʼkidlash joizki, Partiya tomonidan ushbu begʻaraz donorlik aksiyasi doirasida turli kasalliklar yoki baxtsiz hodisalar tufayli qonga muhtoj boʻlgan bemorlarga hayot bagʻishlash va ularning sogʻayib ketishlariga hissa qoʻshishdek xayrli va savobli ishlarni kelgusida ham davom ettirish maqsad qilib olingan.

Ushbu xayrli tadbirda ishtirok etish imkoniyatiga ega boʻlgan barcha koʻngillilarni Respublika qon qoʻyish markazi hamda uning Respublikadagi hududiy boʻlimlari orqali jarayonlarda ishtirok etishga chaqiramiz. Aksiya davom etadi!