Navroʻz bayrami koʻtarinki ruhda nishonlandi

Sharqona yangi yil, yasharish va yangilanish bayrami doimo insonlarga baxt-saodat ulashib kelgan. Shundanmi, har yili uning kelishini intiq boʻlib kutamiz. Eng qadimiy, eng sevimli va umumxalq bayrami sifatida qadrlaymiz.

“Аdolat” SDP Fargʻona viloyat Kengashi jamoasi ham ayyomni katta shodiyona bilan nishonlashdi. Bayram dasturxoni yozilib, shahar-tuman Kengashi raislari, faol deputatlar taklif qilindi.

Partiya raisi Shaxnozaxon Gʻaniyeva bayram bilan jamoa aʼzolarini samimiy muborakbod etib, xonadonlariga fayz-u baraka, tinchlik xotirjamlik tiladi.

– Yurtimiz tinchligiga koʻz tegmasin. Bayramlarning koʻtarinki kayfiyatda nishonlanishi, barchamizning bir dasturxon atrofida jam boʻlishimiz, bebaho neʼmat tufaylidir, – deydi Sh.Gʻaniyeva. – Navroʻz ayyomi barchamizning qalblarimizga yangidan yangi maqsadlar va niyatlar ulashsin. Partiyamiz maqsadi va vazifalari roʻyobi yoʻlida tolmay mehnat qilaylik.

Bayram dasturi davomida partiya tizimida oʻz mehnati va tashabbuskorligi bilan sidqidildan mehnat qilib kelayotgan bir guruh partiya faollari Kengash raisi tomonidan taqdirlandi.

“Аdolat” SDP Fargʼona viloyat Kengashi Matbuot xizmati.