Oʻzbekiston Respublikasi Prezidenti saylovi yakunlari boʻyicha brifing oʻtkazildi

Bugun “Adolat” sotsial-demokratik partiyasi Oʻzbekiston Respublikasi Prezidenti saylovining yakuniy natijalariga bagʻishlangan brifing oʻtkazdi.

Unda partiya faollari, ommaviy axborot vositalari xodimlari, jurnalist va blogerlar hamda keng jamoatchilik vakillari ishtirok etdi.

Jarayonda Oʻzbekiston Respublikasi Prezidentligiga “Adolat” sotsial-demokratik partiyasidan nomzod Robaxon Maxmudova oʻtkazilgan saylov, ushbu jarayonda partiyaning ishtiroki yuzasidan bayonot berdi.

Dastlab, R.Maxmudova mamlakatimiz ijtimoiy-iqtisodiy hayotidagi muhim siyosiy voqea – Oʻzbekiston Respublikasi Prezidenti saylovi nihoyasiga yetgani va bu saylov yangicha ruhda oʻtganligini taʼkidlar ekan, mazkur saylovda “Adolat” sotsial demokratik partiyasi nomzodi sifatida ishtirok etish masʼuliyatli boʻlganligi bilan bir qatorda yuksak sharaf ekanligini alohida eʼtirof etdi.

- Biz safdoshlarimizning hamjihatligida oʻz gʻoya va tashabbuslarimiz bilan bu saylovlarga kirishdik va saylov kampaniyasi davrida elektoratimiz va keng jamoatchilik bilan ochiq va samarali muloqotni yoʻlga qoʻya oldik. Saylovoldi tashviqoti davrida joylardagi uchrashuvlarimizni oʻtkazishda va ommaviy axborot vositalari orqali chiqishlarda, Saylovoldi dasturimizni targʻib qilishda, ayniqsa, deputatlarimiz va partiyaning hududiy tashkilotlari xodimlari alohida faollik koʻrsatishdi.

Shu munosabat bilan barcha “Adolat” sotsial demokratik partiyasi aʼzolari va faollariga oʻzimning chuqur ehtiromimni va minnatdorchiligimni bildirmoqchiman, — dedi tadbir jarayonida Robaxon Maxmudova.