Oʻzbekiston Respublikasi Prezidentligiga nomzod Robaxon Maxmudova Namangan viloyati saylovchilari bilan uchrashdi

Bugun oʻzining hunarmandchiligi bilan dunyoga mashhur boʻlgan Chust tumanida Oʻzbekiston Respublikasi Prezidentligiga “Adolat” sotsial-demokratik partiyasidan koʻrsatilgan nomzod Robaxon Maxmudovaning Namanganlik saylovchilar bilan uchrashuvi boʻlib oʻtdi.

Uchrashuvda Oliy Majlis Qonunchilik palatasi deputatlari, partiya faollari, talaba-yoshlar, keng jamoatchilik va ommaviy axborot vositalari vakillari ishtirok etishdi.

Dastlab, uchrashuvda “Adolat” sotsial-demokratik partiyasidan Oʻzbekiston Respublikasi Prezidentligiga nomzod Robaxon Maxmudovaning bosh ishonchli vakili Inomjon Qudratov tomonidan saylovchilarga nomzod haqida batafsil maʼlumot berildi.

Shundan soʻng Prezidentlikka nomzod Robaxon Maxmudova saylovchilar bilan yuzlashib, mamlakat rivoji, xalqimiz farovonligi, mamlakatimiz taraqqiyoti yoʻlida amalga oshirishga qaratilgan gʻoya va maqsadlari aks etgan Saylovoldi dasturi va unda ilgari surilayotgan ustuvor yoʻnalishlar boʻyicha ishtirokchilarni yaqindan tanishtirdi.

Nomzodning Saylovoldi das­turida Vatanimiz taraqqiyoti yoʻlida huquqiy demokratik, ijtimoiy davlat va barcha uchun farovonlik taʼminlangan adolatli fuqarolik jamiyati qurishning sotsial-demokratik modeli taklif etilmoqda.

Taʼkidlash joizki, nomzod dasturida xalq davlat hokimiyatining birdan-bir manbai ekanligi haqidagi konstitutsiya­viy prinsip davlat siyosatining ustuvor yoʻnalishi sifatida taʼkid­lanib, xalq hokimiyatining yorqin timsoli boʻlmish vakillik demokratiya­si institutining roli va ahamiyatini yanada oshirish, mamlakat iqtisodiyotining barqaror rivojlanishini taʼminlash, jamiyatning innovatsion, intellektual salohiyatini roʻyobga chiqarish va inson kapitalini rivoj­lantirish kabi masalalarda izchil takliflarning ilgari surilayotgani tadbir ishtirokchilarida katta qiziqish uygʻotdi.

Dasturda subsidiyalar berish tizimini yanada takomillashtirish va maqsadli ishlatilishi ustidan jamoatchilik nazoratini kuchaytirish, bojxona va soliq imtiyozlarini takomillashtirish, imtiyozlarni aniq sohalarga berish, hududlar oʻrtasidagi iqtisodiy bir xil oʻsishni taʼminlash, barcha tuman va shaharlarni bir maromda rivojlantirishni nazarda tutuvchi takliflar ilgari surilayotganligi ahamiyatlidir.

Uchrashuv davomida partiya faoli, Namangan davlat universiteti prorektori Narimon Dexqonov, xalq deputatlari Namangan viloyat Kengashi deputati Saidolim Abduraxmonov, partiyaning viloyat Kengashi “Yosh adolatchilar” qanoti raisi Abdulbosit Sobirxonov, va Oliy Majlis Qonunchilik palatasi huzuridagi Yoshlar parlamenti aʼzosi Nozima Akbarova soʻz olib, Prezidentlikka nomzod Robaxon Maxmudovaning Saylovoldi dasturi yurtparvar gʻoya va maqsadlar jamlanmasi ekanligini eʼtirof etish barobarida, yigʻilganlarni kutilayotgan muhim siyosiy tadbirda Robaxon Maxmudovaga ovoz berishga chaqirdi.

Uchrashuv yakunida saylovchilar tomonidan berilgan savollarga Prezidentlikka nomzod Robaxon Maxmudova batafsil javob berdi.

Oʻzbekiston Respublikasi Prezidentligiga nomzod Robaxon Maxmudovaning saylovchilar bilan uchrashuvlari davom etadi.

“Adolat”SDP

Namangan viloyat kengashi Matbuot xizmati.