TEŃ IMKANIYATLAR HÁM ÁDIL JÁMIYETKE QARAY!

Bas maqsetimiz Konstituciya hám nızamlardıń ústinligi támiyinlengen jáne insan huqıqları menen erkinlikleri qorǵalatuǵın huqıqıy mámleket qurıw bolıp tabıladı.

Ádil hám ǵárezsiz sud sistemasın jaratıw arqalı puqaralardıń ádil sudlawǵa bolǵan isenimin bekkemlew ilajların kóremiz. Puqaralarǵa jeńillik jaratıw jáne sudlardıń jumısında sapa hám nátiyjelilikti arttırıw maqsetinde hár bir rayon hám qalada puqaralıq isleri boyınsha sudlardı shólkemlestiremiz.

Puqaralardıń sud hákimiyatına isenimin arttırıwda sudyalardıń erkin bolıwı áhmiyetli ólshem bolıp, sudyalardıń huqıqların joqarı dárejede kepillew hám jumıs júklemelerin optimallastırıw maqsetinde "Sudyalardıń statusı haqqında"ǵı Ózbekstan Respublikasınıń nızamın islep shıǵamız.

"Adolat" SDP ushın eń joqarı qádiriyat bul - insan, onıń huqıqları hám erkinlikleri! Usı maqsette puqaralardıń huqıqları menen erkinliklerin qorǵawda huqıq qorǵaw uyımlarınıń jumısın nátiyjeli shólkemlestiriw, ásirese, ishki isler uyımları xızmetkerleriniń huqıqıy mádeniyatı, insan huqıqlarına ámel etiw juwapkershiligin túp-tiykarınan arttırıw, máhállelerdegi profilaktika inspektorlarınıń barlıǵı joqarı yuridikalıq maǵlıwmatqa iye bolıwın támiyinlew usınısın alǵa súremız.

Mámleketlik uyımlar yaki lawazımlı shaxslardıń nızamǵa qayshı qararları, háreketleri yamasa háreketsizligi aqıbetinde jetkerilgen zıyannıń ornı mámleket tárepinen qaplanıwın názerde tutatuǵın "Mámleketlik kompensaciya haqqında"ǵı nızam qabıl etiwdi usınıs etemiz.

Aydawshılar tárepinen jol háreketi qaǵıydaların turaqlı buzǵanı ushın nızam hújjetlerinde jaza ilajların kúsheytiw, sonıń ishinde, transport quralın más halda basqarǵan yamasa awır aqıbetlerge sebep bolǵan jaǵdaylarda ómirlikke aydawshılıq huqıqınan ayırıwdı usınıs etemiz.

Aymaqlarda deputatlar wákilligin kúsheytiw hám olardıń hákimler menen huqıqıy qatnasıqlarda óz-ara tıyıp turıw mexanizmin jetilistiriw maqsetinde jergilikli Keńes deputatlarına tiyisli hákimlerge isenimsizlik votumın bildiriw huqıqın beriw tárepdarımız.

Biz jurnalist hám blogerlerdiń nızam sheńberindegi jumısına birde-bir lawazımlı shaxs aralasıwı yamasa olarǵa basım ótkeriwi pútkilley jol qoyılmaytuǵın jaǵday, dep esaplaymız. Bunday qılmıs ushın juwapkershilikti belgilewdi usınıs etemiz.

"Kóp dáramat tapqan kóp salıq tóleydi" principine boyınsha jáne ádil hám nátiyjeli salıq hám byudjet siyasatın ámelge asırıw maqsetinde salıqqa tartıwdıń progressiv stavkaların turmısqa engiziw hám sol arqalı dáramatlar teńsizligin azaytıwǵa erisemiz.

Biz ádillik hám haqıyqat ushın gúresemiz!