“Адолат”да семинар-тренинг

Ёшларни ҳар томонлама қўллаб-қувватлаш, уларнинг лидерлик қобилиятларини ривожлантириш ва жамият тараққиётидаги ижтимоий фаоллигини ошириш масалалари «2022—2026 йилларга мўлжалланган Янги Ўзбекистоннинг тараққиёт стратегияси»да ҳам ўз аксини топган.

Бугунги ахборот асрида ёшларимиз, юртдошларимиздан нафақат, жамият ривожи учун муҳим бўладиган ташаббускорлик, инноваторлик фазилатлари талаб этилмоқда балки, лидерлик, нотиқлик санъатидан хабардор бўлишларини даврнинг ўзи тақозо этмоқда.

Айни дамда лидерлик ва нутқ маданиятига эга бўлган, салоҳиятли ёшлар сафини кенгайтириш, уларни шахс сифатида камол топишлари учун зарур шароитларни яратиб бериш олдимизда турган муҳим вазифалардан бири саналади.

Шу боисдан бугун Ўзбекистон «Адолат» социал-демократик партияси Сиёсий Кенгаши Марказий аппаратида партия томонидан «Сиёсий лидерликда нотиқлик санъатидан фойдаланиш усуллари» мавзусида онлайн шаклдаги семинар-тренинг ташкил этилди.

Мазкур тадбирда Ўзбекистон Республикаси Олий Мажлис Қонунчилик палатаси депутатлари, партиянинг Сиёсий Кенгаши Марказий аппарати ҳамда ҳудудий ва маҳаллий Кенгашлар ходимлари, вилоят, туман, шаҳар Кенгашлари депутатлари, «Аёллар ва «Ёш адолатчилар» қаноти раислари, «Ёшлар парламенти» аъзолари, «Истеъдод клуби» ва «Адолатнинг фаол адолатчи аёллари» клублари аъзолари, талаба ёшлар ҳамда ОАВлар вакиллари иштирок этди.

Ушбу семинар-тренингдан кўзланган асосий мақсад ёшларнинг лидерлик қобилияти ва кўникмаларини ривожлантириш, уларнинг нотиқлик санъати борасидаги салоҳиятини юксалтириш орқали давлат ва жамият ривожига дахлдор таклиф ва мулоҳазаларини эркин баён этишларига имконият яратиб бериш, қолаверса, келгусидаги фаолиятларида халқ билан ишлашнинг замонавий услубларидан фойдаланишлари учун муҳим бўлган кўникмаларга эга бўлишларига ҳисса қўшишдан иборатдир.

Таъкидлаш жоизки, интерфаол усулда ўтган семинар-тренингда ёшларнинг дебатларда иштирок этишлари, ОАВга интервьюлар бериш қоидалари, сайловчилар билан учрашувлар, шунингдек, баҳсли вазиятларда ўзини тутишни ўргатувчи амалий машғулотлар ҳам бажарилди.

Жонли мулоқот, савол-жавоб ва баҳс-мунозараларга бой бўлган семинар-тренинг сўнгида иштирокчиларга кун тартибидаги масалалар юзасидан тегишли тавсиялар берилди.

«Адолат» СДП Матбуот хизмати