Боқимандалик энг ёмон иллат

“Қўлдан берганга қуш ҳам тўймайди” дейди доно халқимиз.

Сўнги вақтларда “берсанг ейман, бермасанг ўламан” дейдиган инсонлар анчайин кўпайгандек, назаримда.

Давлат идораларига тушадиган хатларнинг ярмидан кўпи “менга нимадир етишмайди, қилиб беринглар, олиб беринглар” сингари мурожаатлардир. Ачинарлиси шундаки, уларнинг кўпчилигининг тўрт мучаси соғ инсонлар.

Бугунги кунда давлатимиз томонидан барча учун кенг имкониятлар яратиб берилди. Аҳолининг кам таъминланган қисмини қўллаб-қувватлаш мақсадида бюджетдан катта миқдордаги маблағлар ажратилмоқда. Аммо, бу каби ёрдам олаётган инсонларнинг айримлари ҳаётини ижобий томонга ўзгартириш, янги босқичга кўтариш ўрнига, энди “каттароқ, кўпроқ ёрдам берасан” дейишмоқда.

Куни кеча бир ҳолатга гувоҳ бўлдимки, бу ҳолат ҳар қандай виждони уйғоқ инсонни ўйлантиради. Воқеа шундан иборатки, халқ томонидан сайланган фаол депутатлардан бири аҳоли билан учрашув жараёнида бир оила унга мурожаат қилиб, ёрдам беришини сўрайди. Депутат кўмаги билан бу оилага ўтган 2021 йилда сигир олиб беришга кўмаклашилган. Қиш фаслида моддий қийинчиликларга учраган оила аъзолари сигирни сотишга мажбур бўлган, энди унга яна сигир олиб бериш зарурлиги ҳақида ариза билан депутатга мурожаат қилди. Аммо, юқоридагига ўхшаган ҳолатлар жамиятнинг елкасига юк бўлиб, боқимандалик кайфияти орқали бутун бир жамият оёғига кишан солиб, давлатнинг ривожига ғов бўлмаяптими?! Бу ҳам жаҳолатнинг бир кўриниши эмасми?! Биз маънавий-маърифий ишларни кўпайтириш орқали халқимизга хос бўлмаган боқимандалик каби иллат, ачинарли ҳолатларга барҳам бермоғимиз, қарши курашмоғимиз даркор. Хайр-саховат ўзбек халқининг ўлмас анъаналаридан эканлигига пандемия даврида, “Сардоба” воқеаларида гувоҳи бўлдик. Уларни моддий қўллаб-қувватлашдан олдин маънавий, руҳий ҳолатини жонлантириш, ўз ҳаётига нисбатан масъулиятини ошириш, Ватанимиз равнақи йўлида хизмат қилиш, ватанпарварлик туйғуларини ўйғотишимиз лозим. Биз бу жамиятнинг бир бўлаги сифатида ҳар биримиз жамоатчилик назоратини олиб бориш орқали барча муаммоларни ижобий ҳал этишда бир тан-у бир жон бўлишимиз талаб этади.

Икром Эрмаматов
“Адолат” СДП Ташкилий ва партиявий ишлар бошқармаси
Ахборот-таҳлил бўлими етакчи мутахассиси