Фарғонада туман-шаҳар кенгашларининг пленумларини ўтказиш бошланди

Мамлакатимизда кечаётган муҳим сиёсий жараён – Олий Мажлис Қонунчилик палатаси ва маҳаллий кенгашлар депутатлари сайлови олдидан тарғибот-ташвиқот тадбирларини ўтказиш бошланмоқда. Уларда партия тизимидаги вакилларнинг фаол иштирок этиши ҳар жиҳатдан муҳим. Юртимиздаги 5 та сиёсий партия 5 йил аввал илгари сурган ғоя ва ташаббусларнинг халқимиз ҳаёти ва давлатимиз тараққиётига нечоғлиқ аҳамият касб эта олгани ҳақида таҳлилий маълумотларни тақдим этган ҳолда янги мақсадларини баён этишади.  

Бугун эса жорий сайловда муносиб иштирок этиш учун партияда етарлича тажриба ва салоҳият бор. Навбатдаги сайлов жараёнларида яратилган имкониятлардан оқилона фойдаланиш, партиядан депутатликка муносиб номзодларни кўрсатиш орқали халқнинг ишончли сиёсий тузилмасига айланиш асосий мақсад қилинган.

Фарғонада Ўзбекистон СДП шаҳар-туман  Кенгашларининг навбатдаги пленумлари бўлиб ўтмоқда.  Бешариқ ва Фурқат, Фарғона туманларида бўлиб ўтган  пленумларда  туман кенгашларининг Ўзбекистон Республикаси Олий Мажлиси Қонунчилик палатаси, вилоят ва шаҳар, туман Кенгаши депутатлигига бўлиб ўтадиган сайловларда муносиб иштирок этиши бўйича режалар белгилаб олинди.

 – «Адолат - ҳар бир  инсон учун!» шиори остида ўтган 5 йил давомида депутатларимиз саъй-ҳаракати билан халқимизни қийнаётган кўплаб муаммоларни ҳал қилиш орқали партия нуфузини оширишга эриша олдик, - дейди  партиянинг Фурқат туман Кенгаши раиси Нодиржон Олимов. – Жорий   йилнинг 27 октябрь куни Ўзбекистон Республикаси Олий Мажлиси Қонунчилик палатаси, халқ депутатлари вилоят, туман шаҳар Кенгашлари депутатлигига бўлиб ўтадиган сайловларда фаол иштирок этиб, халққа хизмат қилиш, фидойи номзодларимизни депутатлик мақомига эга бўлишлари учун тарғибот ишларини изчиллик билан амалга оширамиз.

Қайд этиш ўринлики, ўтган сайлов даврида халқимиз орасидан танланган энг муносиб номзодлар партия депутатлиги даврида ўз сайловчиларининг ишончини қозонишга муваффақ бўлди. Уларнинг  ҳар бир мурожаатларини тизимли ҳал этишдаги фаоллиги туфайли «Адолат»  СДПнинг танилувчанлиги  ортди, дейиш мумкин.   

«Адолат» СДП

Фарғона вилоят Кенгаши

Матбуот хизмати